Ngjarja tragjike e Shkodrës ku 39-vjeçarja Alma Arrizi (Bushati) dhe tre fëmijët e mitur të saj u gjetën të mbytur në lumin Buna është e mbushur me mister.
Prokuroria dhe Policia e Shkodrës kanë ngritur dyshime dhe e kanë hedhur poshtë aktualisht pistën se Alma dhe tre fëmijët e saj janë hedhur nga ura e lumit Buna mbrëmjen e 2 Majit. Kjo për shkak se një kukull është gjetur poshtë urës së lumit Buna, e cila dyshohet se iu përket një prej vajzave të mbytura.
Kukulla u gjet në fund të urës së re Bunës, në këmbët poshtë urës, në një vend me zhavor dhe pemë e shkurre dhe është sekuestruar nga Prokuroria, ku është çuar për t’i bërë AND-në nëse ka apo jo lidhje me njërin prej tre fëmijëve të mbytur të Alma Arrazit, raporton News24. Kukulla e gjetur në breg poshtë urës, bëri që forcat RENEA nga fshati Darragjat ku u gjet vajza 9 vjeçe të përqëndrojnë kërkimet e tyre në këtë vijë ujore të lumit.
Vetëm pak metra më tutje, tek pinarët u gjet trupi i pajetë i vajzës 8 vjeçare. Jo shumë larg nga pinarët, në një largësi prej afro 2-3 kilometër në afërsi të Oblikës në Anën e Malit u gjet edhe trupi i djalit 4 vjeçar dhe rreth 35 kilometër nga aty përballë fshatit Pentar në ujërat që i përkasin Malit të Zi u gjet edhe trupi i pajetë i Alma Arrazit.
Kjo provë çon në dyshimin se Alma Arrazi nuk është hedhur nga ura me fëmijët e saj, por ka shkuar poshtë urës dhe ka hyrë në Bunë në këmbë.
Deri më tani nuk ka asnjë dëshmitar që ka parë 39-vjeçaren dhe 3 fëmijët duke ecur në urë apo edhe duke u ulur poshtë urës së re të Bunës apo edhe momentin kur i dha fund jetës së saj dhe fëmijëve.
Po ashtu të paktën deri më tani nuk ka asnjë dëshmitar që mund ta ketë parë Alma Arrazin duke u hedhur në ujë bashkë me fëmijët e saj si dhe nuk ka asnjë dëshmitar që të ketë dëgjuar zhurma apo të bërtitura fëmijësh. Tashmë pritet që ekspertiza të kthejë përgjigjen e AND-së nëse kukulla i përket njërit prej fëmijëve të Alma Arrazit.
Në kamerat e sigurisë, 39-vjeçarja është parë se para vetëflijimit, ka pirë kafe me kunatën, me të cilët është ndarë qetësisht.
Për ngjarjen e rëndë është arrestuar Erdgys Arrazi, bashkëshorti i Almës dhe babai i tre fëmijëve të mbytur. Ai akuzohet se ka shtyrë gruan me fëmijët drejt vetëvrasjes.
Ka qenë ai, i cili më 3 Maj ka denoncuar në polici largimin nga banesa të gruas me fëmijët. Por, kur një peshkatar i zonës gjeti të pajetë trupin e 9-vjeçares Ergesa, ai u kthye në të dyshuarin kryesor për shkaktin e vetëvrasjes së bashkëshortes dhe tre fëmijëve të tij.
Dyshohet se Erdgys Arrazi ushtronte dhune fizike e psikologjike ndaj 39-vjeçares e fëmijëve dhe vetëflijimi dyshohet se është pasojë e dhunës në familje. Po ashtu, nisur nga provat e gjetura në celularin e tij, dyshohet se Erdgys Arrazi dhe e tradhtonte bashkëshorten.
Prokuroria dhe policia vijojnë hetimet për të zbardhur të plotë këtë ngjarje.
