Presidenti i Partisë së Lirisë, Ilir Meta, ka reaguar në lidhje me deklaratën e krerëve të komuniteteve fetare se nuk janë thirrur në një debat për projektligjin për shëndetin riprodhues, duke u thënë të mos shqetësohen sepse populli shqiptar nuk do të lejojë miratimin e një ligji të tillë.
Meta tha se kushdo që përpiqet të kthejë vendin tonë në një fermë surrogacie do të çuditet nga përgjigje që do të marrë nga shqiptarët.
“Krerët e besimeve fetare: Jini të qetë. Për ne tentativa për të shndërruar këtë vend në një fermë laboratorike të internacionales surrogate do marrë përgjigje të merituar. Agresioni i 7 prillit nuk është asgjë para kësaj. Tashmë ne e kemi përgjigjen me 5 prioritetet. Nëse kujtojnë se gjaku i shqiptarëve është bërë ujë, do të çuditen edhe vetë kudo janë për përgjigjen që do tu japë populli i lirisë dhe dinjitetit. Nuk kemi moshë për të dalë me tanga”, tha ai.
Gjithashtu Meta la porosi për anëtarët e partisë që të jenë sa më aktivë në rrjetet sociale për të përçuar mesazhin dhe programin e partisë.
Ai kritikoi fuqishëm projekt-ligjin për shëndetin riprodhues duke thënë se shkatërron familjen tradicionale shqiptare. Meta theksoi se Internacionalja e Surrogatëve do të hidhet në Lanë nga shqiptarët.
“Do ta hedhim në Lanë Internacionalen e Surrogatëve. Shqiptarët në Lanë do i hedhin të gjithë surrogatët. Nuk kemi ne vajza e gra këtu, ne i kemi për familjet shqiptare, për vendin tonë, për kombin tonë, që t’i dalim zot vendit. Edhe zot vendit do i dalim dhe në BE do të integrohemi. RMV hodhi surrogatët në Vardar, ne do i hedhim në Lanë.”– tha ai.
