Kryeministri Rama ftoi ditën e djeshme të gjithë faktorin opozitar për të bashkëpunuar për përforcimin e reformave me qëllim krijimin e një shteti evropian.
Pas ftesës së tij, ka reaguar edhe presidenti i PL-së, Ilir Meta i cili thotë se nuk e kupton ca është “ky komisioni i posaçëm”.
Meta theksoi për gazetarët se kur Rama të pranojë të gjitha komisionet hetimore të opozitës ende mund të besohet se ka një reflektim.
“Nuk e kuptoj ca është ky komisioni i posaçëm. Ky është një vend që mbeti falë rilindjes duke u bërë një laborator eksperimentesh të posaçme. Ne kemi kushtetutën dhe i qëndrojmë kushtetutës për ndarjen e pushteteve, për garantimin e llogaridhënies në Kuvend dhe kudo. PL është këtu dhe do jetë kudo në Kuvend, në institucione në mbrojtje të kushtetutës. Llogaridhënia do vendoset shumë shpejt. Kur Rama të pranojë të gjitha komisionet hetimore të opozitës ende mund të besohet se ka një reflektim”, tha Meta.
Ai shton se askush nuk pret reforma nga rama, pasi është vetë ai i cili përpiqet me çdo kusht të rrisë presionin për të intimiduar median dhe të centralizojë pushtetet.
“Ai përpiqet me çdo kusht të rrisë presionin për të intimiduar median dhe shtypin e lirë, përpiqet cdo sekondë të centralizoje pushtetet përfshirë edhe dardhat që do ti marrë në një dorë në mënyrë absurde, këto janë tregues se kemi të bëjmë me shashka që nuk çudisin askënd. Nuk pret askush reforma nga Rama”– tha Meta.
