Ashtu si në ditën e “Fitër Bajramit”, kryebashkiaku i Tiranës, Erion Veliaj, është shfaqur sërish sot në rolin e politikanit të dhimbshëm për njerëzit në nevojë.
Veliaj nuk humbet asnjë mundësi të përdorë propagandën e tij për të mbuluar skandalet e qeverisë dhe së fundmi të Bashkisë së tij teksa afera “5D” dominon skenën politike në vend prej disa javësh tashmë.
Këtë herë Veliaj shërbeu drekën e Pashkës për njerëzit në nevojë në qendrën komunitare në Shkozë.
Kryebashkiaku socialist edhe sot u shfaq i pashqetësuar megjithëse ndodhet në qendër të skandaleve dhe aferave të njëpasnjëshme që kanë kryer drejtorët e emëruar prej tij të cilët akuzohen nga SPAK për miliona euro të vjedhura, para të taksapaguesve shqiptarë.
Skandali më i fundit është ai i ‘5D’, kompanisë së drejtorëve të Bashkisë së Tiranës, që njëherazi ishin anëtarët e shtabit elektoral, që ditë e natë shantazhonin votuesit, blinin vota, premtonin, bënin presion, merrnin paratë nga buxheti, që më pas i përdornin me një skemë të sofistikuar, si fillim për të mbajtur në detyrë Erion Veliajn dhe më pas për të shumëfishuar fitimet, jo me përqindjet e zakonshme të korrupsionit, por 100% të fondeve.
Për këtë çështje, vetë Veliaj u thirr nga Prokuroria e Posaçme 5 ditë më parë ku u mbajt për rreth 8 orë.
Ai ka dëshmuar në lidhje me mega aferën miliona euro të inceneratorit të Tiranës, për të cilin vazhdojnë të paguajnë rreth 80 mijë euro në ditë prej vitesh, edhe pse inceneratori nuk ekziston.
Në prononcim e dhënë për mediat pas daljes së tij, Veliaj sërish tentoi ta paraqiste sikur kishte shkuar me vullnetin e tij në SPAK, ndërsa u provua që në adresë të tij ishte lëshuar një fletë-thirrje nga ana e SPAK që provonte që paraqitja e tij atje ishte e detyruar.
