Apeli i GJKKO-së ka rrëzuar kërkesën e ish-zyrtarëve dhe ish-drejtorëve të Bashkisë së Tiranës të akuzuar për “Dosjen 5D”.
Apeli ka lënë në fuqi vendimin “arrest me burg” të dhënë më herët nga Gjykata Posaçme e Shkallës së Parë për Korrupsionin dhe Krimin e Organizuar.
Pesë zyrtarët e arrestuar: Mariglen Qato, Redi Molla, Taulant Tushe, Julian Zanaj dhe Englentina Zere akuzohen për vjedhjen e miliona eurove të taksapaguesve shqiptarë.
Kujtojmë që shoqëria civile së bashku me opozitë kanë protestuar disa herë përballë Bashkisë së Tiranës ku kërkuan dorëheqjen e kryebashkiakut Erion Veliaj pas aferës “5D”, ku drejtorët e bashkisë në kryeqytet kishin përfituar miliona euro tendera nga kjo bashki apo institucione vartëse të saj me kompaninë e tyre “5D Konstruksion”, që sipas SPAK, pronarët “de facto” të saj ishin Mariglen Qato dhe Redi Molla.
Kujtojmë që mëngjesin e së martës Erion Veliaj ka shkuar në ambientet e SPAK për të dhënë “llogari” pas disa aferave korruptive ku më kryesorja inceneratori i Tiranës.
Njoftimi i plotë nga GJKKO:
“Gjykata e Posaçme e Apelit për Korrupsionin dhe Krimin e Organizuar, me trup gjykues monokratik të përbërë nga gjyqtari Florjan Kalaja, sot më 05.05.2024, shpalli vendimin mbi çështjen penale nr. 18 akti, datë 29.04.2024 regjistrimi, mbi ankimet e personave nën hetim R.M., M.Q., T.T., J.Z. dhe E.Z., me objekt: “Ankim ndaj vendimit nr. 28, datë 28.03.2024, verifikuar me vendimin nr. 35, datë 30.03.2024 të Gjykatës së Posaçme të Shkallës së Parë për Korrupsionin dhe Krimin e Organizuar”, disponuar në lëndë të masave të sigurimit personal, dhe vendosi:
Miratimin e vendimit nr. 28, datë 28.03.2024 të Gjykatës së Posaçme të Shkallës së Parë për Korrupsionin dhe Krimin e Organizuar, përsa i përket disponimeve kundrejt apeluesve z. J.Z., z. T.T., znj. E.Z., z. M.Q. dhe z. R.M.
Miratimin e vendimit nr. 35, datë 30.03.2024 të të Gjykatës së Posaçme të Shkallës së Parë për Korrupsionin dhe Krimin e Organizuar, përsa i përket disponimeve kundrejt apeluesve z. J.Z., z. T.T., znj. E.Z., z. M.Q. dhe z. R.M.
Kundër këtij vendimi mund të ushtrohet rekurs në Gjykatën e Lartë brenda 45 ditëve, duke nisur ky afat nga dita e nesërme e njoftimit të vendimit të arsyetuar”, thuhet në njoftim.
