Skënderbeu është në hall para ndeshjes së radhës me Partizanin. Në seancën e fundit stërvitore është dëmtuar sulmuesi Ardit Nikaj, i cili ka lënë fushën pas një përplasjeje në lojë.
Dëmtimi i shkodranit ka sjellë jo pak ankth në kampin bardhekuq, duke parë që forca e përplasjes ka qenë e madhe dhe dëmtimi në pamje të parë është dukur serioz.
Gjithçka ka ndodhur në mbyllje të seancës stërvitore, kur trajneri Ivan Gvozdenoviç ka provuar rreshtimin për ndeshjen e radhës në transfertë.
Sulmuesi ka marrë një goditje në gjurin e djathtë, që më parë e ka dëmtuar rëndë dhe e ka operuar, duke qëndruar jashtë fushave për më shumë sesa 6 muaj. Kontrasti mes dy lojtarëve ka qenë i fortë dhe lojtari ka ndjerë dhimbje të madhe.
Stafi mjekësor i Skënderbeut i ka dhënë Nikajt ndihmën paraprake. Sipas mjekëve, gjuri ka pasur hematomë dhe një traumë të brendshme, por kontrollet e detajuara që do të zhvillohen ditët në vijim do të tregojnë më saktë shkallën e dëmtimit, që gjithsesi është serioz.
