Gjatë këtyre ditëve, por edhe pas daljes nga SPAK, kreu i Bashkisë së Tiranës Erion Veliaj ka pretenduar se shkoi në Prokurorinë e Posaçme me vullnetin e plotë për të dëshmuar për inceneratorin, madje se këtë gjë e kërkonte prej kohësh, por në fakt ky është thjesht një mashtrim i radhës prej tij.
SPAK i ka dërguar fletë-thirrje Veliajt që ditën e mërkurë, 24 Prill dhe pasi iu dërgua fletë-thirrja, Veliaj doli në intervistë në televizionet e tij dhe mashtroi duke thënë se do shkonte vetë në SPAK.
Gazetarja Klodiana Lala ka publikuar edhe dokumentin e fletë-thirrjes gjatë emisionit “Open”, duke rrëzuar çdo pretendim të kreut të Bashkisë së Tiranës.
Fletë-thirrja:
Prokuroria e Posaçme Kundër Korrupsionit e Krimit të Organizuar
Urdhër për thirrjen e shtetasit Erion Veliaj
Tiranë, 24 prill 2024
Unë, Dritan Prençi, me detyrë prokuror në Prokurorinë e Posaçme Kundër Korrupsionit e Krimit të Organizuar në zbatim të nenit 312 të Kodit të Procedurës Penale për marrjen e të dhënave në funksion të hetimit të procedimit penal numër 255 viti 2020.
Urdhëroj: Shtetasi Erion Luan Veliaj, i ditëlindjes 17.12.1979, me detyrë kryetar i Bashkisë Tiranë, të paraqitet në Prokurorinë e Posaçme kundër Korrupsionit dhe Krimit të Organizuar, në datën 30 prill 2024, ditën e martë, në orën 10:00, tek hetuesi A. S., për marrjen e të dhënave për rrethana të dobishme në funksion të hetimit procedurial penal numër 255, viti 2020 (me vete të ketë dokument identifikimi).
Paraqitja e shtetasit të mësipërm kërkohet me qëllim pyetjen e tij si person që ka dijeni lidhur me rrethanat e hetimit, lidhur me hetimet paraprake procedimi penal 255, viti 2020.
Në rast mosparaqitjeje, ditën dhe orën e caktuar, pa pasur pengesa të ligjshme, paralajmërohemi se në bazë të nenit 312/2 të Kodit të Procedurës Penale, do të urdhërohet shoqërimi juaj i detyrueshëm nga Policia Gjyqësore.
Njoftimi i mësipërm të kryhet me anë të shërbimit postar në adresën e punës Bashkia Tiranë.
Prokurori i çështjes, Dritan Prençi
