Kryeministri Edi Rama “ditë-natë” del në televizionet shqiptare dhe bën propagandë duke u krenuar se ka një meritë të veçantë për rritjen e numrit të turistëve që vijnë për të vizituar vendin tonë.
Por kreu i qeverisë harron detyrën e tij për të përmirësuar infrastrukturën rrugore ku shumë plazhe në jug të vendit nuk mund të aksesohen për shkak se qeveria ka lënë në “mëshirë të fatit” rrugët e shkatërruara.
Një tjetër veçori që na turpëron është edhe mungesa e energjisë elektrike gjatë sezonit ku qytetet “turistike” duke nisur nga Pogradeci dhe deri në Sarandë shpesh “zhyten” në errësirë totale për shkak të rrjetit të amortizuar elektrik.
Për të mos kujtuar më pas transportin publik i cili në vendin tonë mungon dhe ata pak turistë që vijnë e kanë të pamundur të lëvizin për shkak të mungesës së hekurudhave, metrove apo edhe transportin ndërqytetas siç kanë shumë vende normale të Europës.
Por kjo nuk e ndal kreun e qeverisë shqiptare të ëndërrojë apo të bëjë propagandë duke deklaruar se vendi ynë do të prekë shifrën e 20 milionë turistëve
“Kur kam thënë më para që “Pas 5 vitesh mos u çudisni sepse do të shkojë 10 milionë dhe shumë kush kishte arsye për ta vënë në diskutim këtë parashikim”, pasi nuk ishte si ato parashikimet që hidhen në ajër apo e bëjnë këtë gjë për të kërkuar vota dhe më pas i merr era. Por ishin parashikime të bazuara në analiza faktike dhe të dhëna konkrete dhe që kanë padiskutim një bazë shkencore. Ndërsa sot nëse më pyesni ku do të jetë Shqipëria 2030 në raport me turistët, kam shumë frikë se do të gaboja pasi do të na duhet të shohim këtë vit dhe vitin e ardhshëm për të pasur një siguri. Nuk është marrëzi të mendosh duke parë si ka filluar ky vit që shifra e 20 milionë turistëve do të arrihet më përpara”, tha Rama.
