Arne Slot do të jetë trajneri i ri i Liverpool-it duke nisur nga sezoni i ardhshëm.
“BBC” shkruan se drejtuesit e “The Reds” kanë arritur marrëveshjen me Feyenoord për të nënshkruar me trajnerin holandez.
45-vjeçari do të jetë pasuesi i gjermanit Jurgen Klopp, i cili njoftoi që në janar se do të largohet në fund të sezonit nga “Anfield”.
Me Feyenoord, Slot fitoi titullin në Holandë në sezonin 2022-2023, ndërsa këtë sezon ata kanë arritur të fitojnë Kupën dhe me shumë mundësi do ta mbyllin kampionatin në vendin e dytë.
Sipas BBC, drejtuesit e Liverpool-it kanë vendosur t’i besojnë trajnerit holandez për lojën sulmuese që ai luan, por edhe për personalitetin që ka.
Xabi Alonso ishte një emër për të cilin u fol shumë se do të zëvendësonte Klopp, por në mars, trajneri që çoi Leverkusenin drejt titullit të parë kampionë në Bundesligë, konfirmoi se do të vazhdojë të paktën edhe për një vit me gjermanët.
