Këshilli Bashkiak i Bashkisë së Roskovecit në mbledhjen e sotme jashtë radhe, në një akt skandaloz, ka miratuar mes debatit ndërtimin e termocentralit në fshatin Suk 1.
Në mbledhjen e kaluar të Këshillit Bashkiak, u rrëzua me shumicë kartonash nga të majtë e të djathtë, duke i dal në mbrojtje 35 mijë banorëve të kësaj zone, por siç duket, ditën e sotme disa prej këshilltarëve socialistë kanë ndryshuar mendim, ndoshta të urdhëruar dhe nga shefja e tyre, kryebashkiakja Majlinda Bufi.
TEC-i do të ndërtohet mes tokave bujqësore dhe konsiderohet si një “bombë ekologjike” që do të sjellë pasoja të rënda për shëndetin dhe jetën e qytetarëve, por edhe për pronat e tyre.
Fermerët e disa fshatrave të Roskovecit dhe Dimalit e kanë konsideruar si vdekjeprurës ndërtimin e këtij termocentrali në zonën e tyre, duke theksuar se prania e tij do të shkatërrojë një sipërfaqe bujqësore prej 700 ha me sera, ku do të ndoten jo vetëm toka dhe uji, por edhe ajri.
Banorët e kësaj zone, si ditën e dielë, por edhe gjatë mbledhjes së sotme të Këshillit Bashkiak kanë protestuar para Bashkisë së Roskovecit, por interesat e tyre nuk janë marrë fare për bazë nga këshilltarët socialistë. Fermerët e zonës janë mbështetur në protestë dhe nga përfaqësues të ambientalistëve.
Ambientalisti Sazan Guri ka deklaruar se TEC-i le të ndërtohet në Greqi, atje ku është edhe përfitimi pasi 90% e energjisë do të shkojë atje, sipas tij.
TEC-i me bazë fosile, me kapacitiet 170 MW, do të ndërtohet nga kompania greke “Gek Terna SA”, e cila do të zotërojë shumicën e aksioneve, bashkë me një kompani shqiptare e cila do të zotërojë vetëm 30% të aksioneve.
Kompania bleu 4 hektar tokë bujqësore në Roskovec dhe më pas i propozoi Qeverisë që aty të ndërtoj TEC-in. Fillimisht, projekti me titull “Impianti Energjitik me cikël të Kombinuar Roskovec, Shqipëri” u dorëzua pranë Agjensisë Kombëtare të Mjedisit AKM. Pra toka bujqësore në mënyrë të jashtëligjshme shndrohet në truall për vepër industriale private.
