Teuta udhëton të dielën në Kukës teksa do të përballet me vendasit në sfidën e vlefshme për javën e 33-të të Kategorisë Superiore.
Në këtë sfidë, për durrsakët do të mungojë mbrojtësi Elmando Gjini, i cili është i skualifikuar për shkak kartonësh, ndërkohë që kthehet mbrojtësi tjetër, David Gjinollari.
Nuk pritet të ketë ndryshime të mëdha në formacionin e trajnerit Edi Martini, ndërsa objektivi i vetëm mbetet marrja e 3 pikëve.
Pas barazimit me Vllazninë në shtëpi, durrsakët nuk mund të lënë të tjera pikë, pasi kampionati po shkon drejt finishit dhe nuk ka kohë për rikuperim.
Pa dyshim, mbrojtja është reparti më i fortë i Teutës, jo vetëm për detyrën parësore që ka në skuadër, por edhe për golat me peshë që kanë shënuar lojtarët e prapavijës.
Gjatë stërvitjes së kësaj jave trajneri Martini ka këmbëngulur në faktin se Teuta duhet të fitojë patjetër në Kukës dhe puna e tij dhe stafit është fokusuar te ky objektiv.
Një tjetër hap fals do ta komplikonte së tepërmi situatën e mbijetesës dhe durrsakët nuk duan ta mendojnë as barazimin në transfertën kuksiane. Edhe pse kundërshtari është thuajse i rënë, në kampin durrsak sfida është vlerësuar maksimalisht.
