Kryetari i Partisë së Lirisë, Ilir Meta, deklaron se kreu i SPAK, Altin Dumani, dëshiron që t’i sekuestrojë partinë dhe t’ia japë Ramës.
Meta deklaroi në “Quo Vadis” se Rama përdori Lulzim Bashën për t’i marrë vulën PD-së që drejtohej nga Berisha.
Kikia: Çfarë fakti keni që zoti Dumani do sekuestrojë PL?
Meta: SPAK mbylli çështjen e Lulzim Bashës dhe e përdorën për të marrë vulën e cila i takonte PD-së së vërtetë që drejtohej nga Berisha. Kush e bëri këtë? Unë e bëra? Gjykata vendosi që vula i takon PD dhe kjo është PD.
Kikia: Kush do ta marrë vulën e PL-së? Thoni që do ta marrë vulën dhe do t’ia çojë Ramës? Kjo është figurative?
Meta: Jo kjo është reale.
Zili: Kë po përdor Rama në PL, nëse në PD përdori Lulzim Bashën?
Meta: Nuk ka çfarë të përdorë, nuk ka buburrec që i merr partinë Erisa Xhixhos dhe Tedi Blushit. Ne jemi partia më transparente.
I pyetur nga moderatorja se si do ta mundë ai Altin Dumanin, Meta theksoi se ai dhe PL kanë shqiptarët me vete.
Borakaj: Si do ta fitoni betejën ndaj Dumanit?
Meta: Kemi popullin me vete?
Zili: A ka vendosur zoti Dumani standarde të reja?
Meta: Jo zero.
Më tej, Meta sfidoi hapur Altin Dumanin duke e ftuar që të dalin të dy në rrugë, për të parë se kush ka më shumë mbështetje.
“Ku e patë ju që më është ulur publiciteti? Popullariteti më është rritur. Ku e di ti që populli dashka më shumë Dumanin se mua? Ja ku jam. E ftoj të vijë. Të dalim në rrugë të dy dhe të shohim kë duan më shumë njerëzit“, tha ndër të tjera Meta.
I pyetur nga analisti Mentor Kikia nëse ka ndonjë informacion për arrestimin e tij dhe se ka frikë nga burgu, Meta u shpreh i qetë se nuk e shqetëson asnjë gjë.
Meta: Dumani nuk ka formimin më elementar për profesionin që ka.
Kur mbron Ahmetajn, metamorfozën pas zgjedhjeve, pse nuk veproi pas Dakos para zgjedhjeve? Kjo është drejtësia me regji. Ai thotë u lodhëm duke hetuar drejtorë që të shpëtojnë Veliajn, hetojnë ministra për të shpëtuar Ramën.
Për Dvoranin kisha unë të drejtë, edhe për Dumanin kam unë të drejtë. Këta po përdoren për asgjesimin e pluralizmit.
Është kthyer në vegël të Edi Ramës. Në çfarë burgu do më fus ai mua? Në burg është ai sepse nuk është i lirë, nuk është vetvetja. Ju e keni parë që ai nuk ka asnjë lloj niveli.
Kikia: Çfarë iu shtyn ju të referoni fjalën burg?
Meta: Asnjë shqetësim fare. Kam 30 vjet me këto punë. Ai ka ardhur me porosi të Edi Ramës dhe McGonigal.
