Është liruar nga qelia e burgut anëtari i bandës së Gaxhait, Armando Sulejmani, i njohur ndryshe me nofkën ‘Çipuri’, i cili u arrestua dy muaj më parë në Durrës, teksa ishte duke udhëtuar me një makinë me targa të vjedhura.
Mësohet se ndaj tij është caktuar masa ‘detyrim për t’u paraqitur’.
“Caktimin si mase sigurimi për personin nën hetim Armando Sulejmani ate të “ detyrimit per tu paraqitur ne policinë gjyqësore” cdo dt.7-17 të muajit, ora 11.00, parashikuar nga neni 234 Kodit Pr.Penale.
Urdhërohet lirimi i personit nën hetim nëse ndaj tij nuk ka ndonjë masë tjetër sigurimi ose vendim të formës së prerë”, thuhet ne njoftim.
Armando Sulejmani, është një emër i dëgjuar për policinë. Ish anëtar i bandës së Gaxhait të Vlorës, ishte dënuar me 20 vite burg për vrasje dhe vetëm pak kohë më parë kishte fituar lirinë. Në 17 shkurt të vitit 2019, Sulemani ka mbetur i plagosur nga një atentat në zonën e “Ujit të Ftohtë” në qytetin e Vlorës. Në ngjarjen ku u plagos “Çipuri” mbetën të vrarë kunati i tij Orest Rexho dhe shoku i tij Arjan Hasani. Të tre ndodheshin në një automjet, ndërsa ndaj tyre është qëlluar me breshëri nga një tjetër automjet. Ne atë kohë nga policia u konfirmua se objektiv ishte pikërisht Sulejmani.
Në lidhje me atentatin dyshohet se ekzekutimi ka lidhje me një histori hakmarrjeje që ka nisur vite më parë, mes dy bandave rivale “Gaxhai” dhe atë të Zani Çaushit. Më 9 maj 1997 midis tyre pati një përplasje ku mbeti i vrarë Bernard Duça, i njohur si “Kuqo”.
Në kundërpërgjigje Gaxhai tentoi të merrte autoblindat e policisë për të luftuar Zanin, por pa mundur tja dalë. Edhe pse dy kokat e bandave sot ndodhen në burg, larja e hesapeve mes tyre vazhdon ende.
