Avokatja Vasilika Hysi thotë se deklaratat e Dumanit për policinë kanë qenë për të justifikuar vonesat e institucioneve të SPAK-ut dhe të Byrosë së Hetimit.
“Në fakt nga njoftimi që ka bërë është një formë justifikimi me çfarë shoh në çështjet që janë regjistruar pranë këtij institucioni. Sepse SPAK ka kompetencën e hetimit apo të grumbullimit të informacioneve në bashkëveprim me byronë e hetimit. Çështjet që shkojnë për ndjekje nga oficerët e policisë gjyqësore pranë drejtorive të policisë janë çështje të posaçme.
Çështjet e tjera të gjitha hetohen nga byroja e hetimit. Veprimi me vonesë për hetimin i kryer nga SPAK dhe nga Byroja e Hetimit e bën që ta kalojnë përgjegjësinë në institucione të tjera. Nuk mendoj se është problemi dhe çështja tek punonjësit e policisë apo tek drejtoria e policisë, por është vetë institucioni I cili ka sjellë vonesa ne hetime dhe verifikime dhe grumbullime informacionesh. Ka qenë një frazë për të justifikuar vonesat e institucioneve të SPAK-ut dhe të byrosë së Hetimit.”- tha avokatja në emisionin ‘’Drejt’’ në Ora News.
