Partizani ka fituar me dy gola derbin e luajtur në “Arenën e Demave” përballë Dinamos, i vlefshëm për javën e 32-të të Kategorisë Superiore.
Ndeshja u dominua nga të kuqtë, të cilët pas rasteve të shumta, gjetën golin e avantazhit në minutën e ’30 të takimit me anë të Bintsuka.
Fundi i pjesës së parë ishte dramatik, ku Dinamo fitoi një penallti, pas ndërhyrjes së gabuar ndaj Zabërgjës të shkaktuar nga Atanaskoskit. Por nga pika e bardhë e 11-metërshit gaboi Denison, ku gjuajtja e tij u prit nga portieri i Partizanit, Pano Qirko.
Pjesa e dytë e lojës nisi edhe më keq për Dinamon. Mesfushori Gudiabi la fushln e lojës në minutën e 47-të të takimit, pasi u ndëshkua me kartonin e dytë të verdhë pas përplasjes me Muratajn dhe la ekipin e tij me 10 lojtarë.
Për golin e sigurisë te Partizani mendoi Albers Keko, i cili u hodh në fushë në minutën e 65 në vend të Bintsuka, teksa 5 minuta pas aktivizimit përshëndeti rrjetën duke dyfishuar shifrat.
Pas këtij rezultati, Partizani shkon në kuotën e 51 pikëve në vendin e dytë, një më pak sesa Vllaznia e vendit të tretë. Të kuqtë duket se “shkelmuan” krizën dhe shkojnë me optimizën në derbin e javës së ardhshme përballë Tiranës.
Ndërkohë, Dinamo mbeti në kuotën e 46 pikëve, po aq sa Tirana duke e ndarë bashkë vendin e katërt, teksa ndiqen nga Skënderbeu me dy pikë më pak. Tashmë, objektivi “Final Four” për Dinamon vështirësohet, pasi në 4 javët e fundit të kampionatit luajnë përballë Laçit, Vllaznisë, Egnatias dhe Teutës
