Trupi gjykues i Kolegjit të Posaçëm të Apelimit, i përbërë nga Albana Shtylla kryesuese, Rezarta Schuetz relatore, Ina Rama, Mimoza Tasi, Sokol Çomo anëtarë, ka lënë në fuqi vendimin për shkarkimin nga detyra të prokurorit të Beratit, Tasim Puci.
“Trupi gjykues i Kolegjit të Posaçëm të Apelimit, i përbërë nga Albana Shtylla kryesuese, Rezarta Schuetz relatore, Ina Rama, Mimoza Tasi, Sokol Çomo anëtarë, shpalli vendimin për çështjen nr. 35/2021, datë 29.06.2021, që i përket ankimit të subjektit të rivlerësimit Tasim Puci kundër vendimit të Komisionit të Pavarur të Kualifikimit nr. 366, datë 15.04.2021.
Në përfundim të gjykimit në dhomë këshillimi, trupi gjykues, bazuar në nenin 66, pika 1, shkronja “a” e ligjit nr. 84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë”, në mënyrë unanime, vendosi:
– Lënien në fuqi të vendimit nr. 366, datë 15.04.2021 të Komisionit të Pavarur të Kualifikimit, që i përket subjektit të rivlerësimit Tasim Puci.“- thuhet në njoftim.
Komisioni i Pavarur i Kualifikimit vendosi më 15 prill 2021 të shkarkojë nga detyra prokurorin e Prokurorisë së Rrethit Gjyqësor Berat, Tasim Puci, pasi u konkludua se kishte kryer deklarim të pamjaftueshëm për kriterin e pasurisë. Ndërkohë ai u vlerësua pozitivisht për pastërtinë e figurës dhe se ka treguar cilësi të pranueshme në punë.
Në vendimin e arsyetuar konstatoheshin probleme në blerjen e një makine që subjekti i rivlerësimit nuk e ka regjistruar si pronë të tijën për disa vite si dhe e ka përdorur pa e pajisur me dokumentacionin e nevojshëm.
Gjithashtu nuk janë provuar burimet e ligjshme për një apartament në Tiranë, që fillimisht e ka prenotuar prokurori Puci dhe më vonë ja ka shitur vjehrrit.
Tasim Puçi e ka nisur karrierën në sistemin e drejtësisë në vitin 1999 dhe ka punuar për 15 vjet si prokuror në Prokuorinë e Beratit.
