Mazhroanca të enjten e kaluar në Kuvend votoi kundër dërgimit në Gjykatën Kushtetuese të shqyrtimit të mandatit të ish-ministres, deputetes Olta Xhaçka, e cila dyshohet se është në konflikt interesi për shpalljen e bashkëshortit të saj, Artan Gaçi si investitor strategjik.
Lidhur me këtë vendim që socialistët me urdhër të shefit të tyre Edi Rama u bënë mburojë për mandatin e Xhaçkës, u pyet nga gazetari kreu i grupit parlamentar të PS-së, Bledi Çuçi, pas mbledhjes së Konferencës së Kryetarëve.
Çuçi deklaroi se kanë zbatuar 100% vendimin e Gjykatës Kushtetuese dhe u kërkoi gazetarëve të mos bjenë pre e spekullimeve.
“Nuk është e vërtetë që ne nuk zbatojmë vendimin e Gjykatës Kushtetuese. Vendimi i Gjykatës Kushtetuese është zbatuar 100% . Ua kam lexuar në publik çfarë thotë vendimi thotë që shfuqizohen vendimet që ka marrë Kuvendi në lidhje me çështjen e Olta Xhaçkës të dyja vendimet që ka marrë që i ka shfuqizuar Gjykata Kushtetuese nuk janë në fuqi. Vendimi i Gjykatës Kushtetuese është zbatuar plotësisht. Me këtë frymë; për ta çuar deri në fund këtë çështje, ne në Këshillin e Mandatave morëm një vendim që t’ia çojmë seancës plenare për t’u shprehur secili deputet për këtë çështje. Mos bini pre e spekulimeve! Është zbatuar 100% vendimi i Gjykatës Kushtetuese. Merreni lexojeni dispozitivin e Gjykatës Kushtetuese dhe aty shprehet qartë se çfarë përmban. Dhe nuk ka ndonjë detyrim për parlamentin që ta sjellë me detyrim në Gjykatën Kushtetuese çështjen për papajtueshmëri të mandatit të deputetes Xhaçka. Është tjetër për pjesën e trajtimit sesi ka arritur në atë vendim Gjykata Kushtetuese dhe aty ka 3 arsyetime të ndryshme”.
