Fitorja ndaj Kukësit ishte më shumë se një fitore. Bardheblutë mbajnë gjallë shpresën për Final Four dhe sjellin pak qetësi në një moment shumë delikat të sezonit.
Gjatë muajve të fundit skuadra ka vuajtur jashtë mase. Një organikë e cunguar me shumë pak alternativa pas largimeve të janarit e disa dëmtimeve. Por, tani ka lajme të mira për klubin dhe stafin teknik.
Në protokollin zyrtar të ndeshjes me verilindorët, për herë të parë këtë sezon, figuronte edhe portieri Gentian Selmani.
Ish-gardiani i Laçit theu këmbën në ndeshjen ndaj Besiktas e që prej atij momenti nuk ka qenë asnjëherë pjesë e skuadrës në ndeshje zyrtare.
Së fundmi ai i është bashkuar stërvitjeve dhe tani mund të quhet një alternativë për katërkëndëshin e portës.
Një tjetër rikthim shumë i rëndësishëm është ai i Ermal Metës. Mesfushori me tipare mbrojtëse u dëmtua në derbin me Partizanin dhe humbi të gjitha sfidat e tjera duke lënë një hendek të madh në formacion.
Ndaj Kukësit ai preku sërish barin e gjelbërt duke hyrë si zëvëndësues në minutat e fundit të ndeshjes.
Dy rikthime që duken si afrime merkatoje për Tiranën në sprintin final të sezonit.
