Edhe Shqipëria, si shumë shtete të tjera ka dënuar sulmet e Iranit ndaj Izraelit. Presidenti i Republikës Bajram Begaj dhe kryeministri Edi Rama kanë shprehur qëndrimet e tyre në emër të shtetit shqiptar në rrjetet e tyre sociale.
Kreu i shtetit, përmes një postimi në rrjetet sociale, deklaron se çdo përshkallëzim i mëtejshëm mund të rrezikojë paqen dhe sigurinë në Lindjen e Mesme.
“Shqipëria dënon ashpër sulmin e paprecedentë të Iranit ndaj Izraelit dhe shpreson se nuk do të ketë përshkallëzim të mëtejshëm. Çdo përshkallëzim i mëtejshëm mund të rrezikojë paqen dhe sigurinë në Lindjen e Mesme dhe të ketë efekte të pakthyeshme në një shkallë më të gjerë”, – shkruan Bajram Begaj.
Ndërsa, kreu i qeverisë thotë se dënon sulmin e paprecedentë të ndërmarrë kundër Izraelit, ndërsa shprehet se Shqipëria solidarizohet me popullin izraelit.
“Shqipëria dënon ashpër sulmin e paprecedentë të nisur nga Irani kundër Izraelit, i cili përbën një kërcënim për të destabilizuar rajonin në mënyrë të pakthyeshme.Ne qëndrojmë në solidaritet me popullin izraelit dhe mbështesim plotësisht përpjekjet e partnerëve tanë drejt de-përshkallëzimit. Shqipëria mbron përmbajtjen dhe thekson nevojën kritike për një armëpushim në Gaza, duke u siguruar që të gjithë pengjet të mund të kthehen të sigurt në shtëpi.” – shprehet Rama, përmes një postimi në rrjetet sociale.
Qëndrimin e tij e ka mbajtur dhe lideri i opozitës, Sali Berisha, shprehet se Izraeli, me ndihmën e aleatëve regjistroi një fitore spektakolare ndaj agresionit të hapur që ndërmori Irani i Ajetullahëve.
“Një fitore shumë e rëndësishme!
Të dashur miq, mbrëmë Irani i Ajetullahëve ndërmori një agresion të hapur ndaj Izraelit. Nga territori i Iranit u nisën drejt Izraelit me qindra e qindra drone dhe raketa në njërën nga ofensivat ajërore më të mëdha të kohës. Por Kubeja e hekurt, mbrojtja kundërajrore e Izraelit e ndihmuar dhe nga SHBA dhe aleate te jere i asgjesoi 99% të tyre duke regjistruar kështu fitoren më spektakolare ndaj një sulmi ajëror dhe disfatën më të madhe të një sulmi të tillë në tërë historinë. Duke uruar Izraelin për fitoren e shkëlqyer të natës që kaloi, dënoj me forcën më të madhe këtë agresion të Iranit, fuqi kryesore pushtuese, luftënxitëse dhe destabilizuese në Lindjen e Mesme.” – shkruan Berisha në rrjetet sociale.
Mbrëmjen mes 13 dhe 14 prillit, Irani sulmoi Izraelin me dronë dhe raketa, në shenjë hakmarrjeje për një sulm vdekjeprurës në konsullatën e tij në Siri, më 1 prill.
Ndonëse Irani e akuzoi Izraelin për kryerjen e këtij sulmi, ky i fundit as nuk e konfirmoi, as nuk e mohoi. Izraeli tha se rreth 300 dronë dhe raketa u hodhën nga Irani, ndërsa disa të tjera edhe nga Iraku dhe Jemeni.
