Rastet e abuzimeve nga punëdhënësit në një treg pune kaotik siç është Shqipëria, janë të shumta. Një nga këto raste, e rrëfeu për ‘Piranjat’ edhe një shofer kamioni, Mario Balla. Ky i fundit para një viti njohu dy vëllezër nga Fieri, Ervis dhe Ilir Sinanajn. Të dy ata i ofruan një kontratë pune në Itali si transfertë shoferësh me qira nga Shqipëria. Vëllezërit hiqeshin si agjentë punësimi, por nuk kishin një zyrë të mirëfilltë ku e kryenin aktivitetin e tyre.
Mario tregoi se pasi lidhnin kontrata 30-ditore me kompanitë italiane, në fund të muajit pagesën për punën e merrnin nga Elvisi, i cili shërbente si ndërmjetës mes dy palëve. Fillimisht, ky bashkëpunim mes vëllezërve nga Fieri dhe Marios shkoi më së miri, mirëpo rrugës gjërat ndryshuan. Pasi Mario, siguroi një leje pune në Itali, ai kërkoi të shkëputej nga bashkëpunimi me Elvis dhe Ilir Sinanajn. Pasi bëri këtë lajmërim, ai kishte për të marrë rrogën e fundit për punën që kishte bërë, atë të dhjetorit, plot 2.200 euro. Por këtë pagesë ai nuk e mori asnjëherë nga vëllezërit me justifikimin se pagesa nuk ishte kryer nga kompania italiane.
‘Pas dhjetorit, që u desh me marrë rrogën, ai tha do ju a kaloj me datë 10 janar, sepse në janar m’i kalon ky italiani. Kur shkoi data 10 i rashë telefonit, i thashë më bëj pagesën vëlla. Tha, po ti nuk do vazhdosh më me mua. I thashë, po të thashë që në dhjetor që nuk vazhdojmë më bashkë, sepse do filloj me rregulla dhe dokumente. Nuk më ka kthyer përgjigje 15 e kusur, i kam shkruar prapë. Tha kur të ma bëjë ai pagesën do të paguaj, sepse s’e kam marrë’, tregoi Mario Balla.
Por pasi kontaktoi vetë me firmën italiane, Mario zbuloi se në të vërtetë pagesa ishte bërë, por ishte Elvisi ai që nuk ia kishte kaluar në llogari. Të njëjtën gjë, Elvis Sinanaj ka bërë edhe me disa shoferë të tjerë.
‘Unë ia çova atë Elvisit me foto, që e ka bërë pagesën me numrin e kartës. Nuk kam marrë më përgjigje fare. Vazhdova unë, fare. Kaloi data 20, 30, por nuk përgjigjej më në telefon. As Iliri. Pastaj takoj një kushëririn e tij këtu në Itali dhe më tha që më kanë thënë që të të them të rrish mirë, që mos ta paguash më shtrenjtë se kaq. Pastaj, pas kësaj, u detyrova të flas ashpër me Elvisin. Aty më tha: ‘Të lutem, zotëri, mos më shqetëso. Paç suksese në jetë’. Ka dhe disa të tjerë këtu që ua ka bërë këtë gjë, sepse ia ka mbajtur edhe punëtorëve të tjerë’, rrëfeu Mario.
Të njëjtën përgjigje Elvisi dha edhe përballë ‘Piranjave’. Ai iu shmang përgjegjësive të tij, duke mos u prononcuar në lidhje me këtë gjë./ Piranjat
