Nga Boldnews.al
Arrestimi i drejtorit të IT-së në Policinë e Shtetit, Ervin Muça, nën dyshimet se ka kopjuar në mënyrë të paligjshme të dhënat e sistemit TIMS, vjen në momentin më të papërshtatshëm për kupolën drejtuese, e cila po merr goditje nga shumë anë për paaftësi, por edhe për lidhje të dyshimta me elementë kriminalë.
Pak ditë më parë, drejtuesi i Prokurorisë së Posaçme, Altin Dumani, vuri në pikëpyetje bashkëpunimin me Policinë.
“Në raste të caktuara, sidomos për hetimet për krimin e organizuar, nuk bashkëpunojmë dot me policinë, sepse na rezulton se ka policë të përfshirë dhe është në nivele te larta”, tha Dumani gjatë raportimit para Këshillit të Lartë të Prokurorisë për aktivitetin institucional gjatë vitit 2023.
Akuza të ngjashme për Policinë janë bërë edhe në të shkuarën. Por, të thëna nga drejtuesi i SPAK-ut, një institucion i vlerësuar nga shumë faktorë të jetës politike dhe publike, kjo situatë aspak normale merr përmasa shumë problematike.
Për të zbutur disi këtë “përplasje”, Ministri i Brendshëm, Taulant Balla, bëri një status në rrjete sociale, ku shkruante:
“Bashkëpunimi edhe më i ngushtë i Agjencisë së Mbikëqyrjes Policore me Prokurorinë e Posaçme, prokuroritë e jurisdiksionit të përgjithshëm dhe agjencitë e tjera ligjzbatuese po mundëson verifikimin e çdo informacioni lidhur me përfshirjen e mundshme të punonjësve të policisë në shkelje apo veprimtari të paligjshme. Konsolidimi i procesit të vetëpastrimit në të gjitha nivelet, lufta e përbashkët për spastrimin e vatrave të krimit përballë dhe brenda vetë organizatës së Policisë së Shtetit, do ta çojë Shqipërinë në një tjetër nivel të sundimit të ligjit. Gjatë tre muajve të parë të vitit 2024, Agjencia e Mbikqyrjes Policore ka inicijuar 35 hetime proaktive me 136 punonjës të policie të proceduar penalisht”.
E, megjithatë, ky procesi i “vetëpastrimit” në Policinë e Shtetit, nëse nuk është funksional, më së paku është tejet i ngadaltë. E, mbi të gjitha, nuk mund të quhet vetëpastrim, kur zyrtarët policorë i kapin hetimet e prokurorisë apo kur duhen zbatuar vendimet gjyqësore për pezullimin nga detyra të oficerëve.
Disa zyrtarë të mesëm policorë janë larguar nga detyra dhe janë arrestuar nga SPAK-u, kryesisht falë të dhënave të përcjella nga autoritetet e huaja për bashkëpunimin me grupe kriminale nëpërmjet komunikimit në platformat “SKY-ECC”.
Ndërkohë, dyshimet kryesore janë që, në komunikime të dyshimta me anën e këtyre platformave, janë përfshirë drejtues shumë të lartë policorë, siç la të kuptohej edhe Dumani. Por, deri më tani, e gjithë kupola policore është në detyrë.
Vetingu në Policinë e Shtetit, i realizuar nga Agjencia e Mbikqyrjes Policore, ka sjellë një rezultat “spektakolar”. Rreth 99 përqind e zyrtarëve të vetuar, të gjithë drejtues të lartë policorë, kanë dalë të pastër dhe janë konfirmuar në detyrë.
Ky rezultat, stonon shumë për dy arsye: Stonon me vetingun në drejtësi, ku gjysma e gjyqtarëve e prokurorëve janë larguar nga detyra; si edhe stonon me faktin se, pavarësisht akuzave publike dhe jo vetëm për drejtues të lartë shtetërorë, sërish ata kanë rezultuar të pastër si kristal.
“Vetëpastrimi” i deklaruar nga Taulant Balla nuk ka funksionuar as brenda Drejtorisë së Përgjithshme të Policisë.
Shefi i IT-së në këtë institucion, Ervin Muça, i cili kopjoi sistemin TIMS, nuk plotësonte kriteret për të qenë në atë detyrë.
Të dhëna të publikuara në media që në verën e vitit të kaluar, dëshmonin se Drejtori i Përgjithshëm i Policisë, Muhamet Rrumbullaku, kishte nënshkruar emërimin e tij me sugjerimin e ish-Ministrit të Brendshëm, Bledar Çuçi, pavarësisht se Muça nuk ishte i përshtatshëm për atë detyrë.
Emërimi i tij shmangu procedurat e konkurimit, ndërkohë që integriteti i tij personal ishte shumë i dyshimtë, për shkak të një të shkuare problematike në Itali.
Pavarësisht këtyre, Ervin Muça ishte në detyrë deri në fillim të kësaj jave, kur gjykata pranoi kërkesën e prokurorisë së Tiranës për caktimin e masës “arrest në shtëpi” dhe “pezullim nga detyra”.
Vetëm pas këtij vendimi, drejtori Rrumbullaku u detyrua të firmoste pezullimin e tij nga detyra.
Muça nuk ishte i vetmi emërim i paligjshëm në kupolën e Policisë së Shtetit. Muhamet Rrumbullaku emëroi Ervina Gjanën në detyrën e Drejtorit të Krimit Kibernetik pa u pajisur më parë me Çertifikatën e Sigurisë.
Gjithashtu, në nëntor 2023, me kërkesë të Ervin Muçës, drejtori i përgjithshëm, Muhamet Rrumbullaku, emëron në pozicionin e Drejtorit të Drejtorisë së Programimit dhe Bazave të të Dhënave, në Departamentin e IT të Policisë së Shtetit, Elona Gogon.
Kjo e fundit, në atë kohë, ishte pjesë e një gjykimi nga SPAK, nën dyshimet për abuzim me detyrën e mëparshme. Vetëm pasi u publikua skandali në media, kreu i Policisë, Rrumbullaku, u detyrua ta shkarkonte nga detyra pak kohë pasi kishte firmosur emërimin e saj.
