Në shtëpinë e Interit ka nisur numërimi mbrapsht për titullin kampion dhe të gjithë po bëjnë llogaritë e ditës kur do të vendoset ylli i dytë në fanellë. Përveç krenarisë dhe historisë, kampionati i 20-të në histori do të mbushte edhe arkat e klubit zikaltër, në një moment që nuk është aspak i mirë në këtë aspekt.
Sipas “Gazzetta Dello Sport”, pa llogaritur rritjen e vlerës së futbollistëve, bëhet fjalë për 50 milionë euro që do të shkonin në arkat e klubit zikaltër nga fitorja e titullit kampion këtë sezon.
Fillimisht është Liga e Serisë A që do të sjellë 23.4 milionë euro nga të drejtat televizive. Edhe UEFA ka një premio për ekipin kampion të Italsë dhe nga llogaria e qeverisë së futbollit europian do të transferohen 10 milionë euro të tjera. Dhe këtu po flasim për para të sigurta. Pastaj ka hapësirë edhe për ato që duhet të vijnë patjetër që kanë lidhje me sponsorët.
Interi do të duhet të fitojë 12 milionë euro të tjera nga premiot e kompanive që kanë marrëveshje marketingu, ku sigurisht do të përmirësohet edhe “brandi” dhe do të rriten kërkesat për sponsorë dhe kontratat do të jenë më të majme në aspektin ekonomik në të ardhmen. Në total zikaltrit do të arkëtojnë dyfishin, duke llogaritur edhe të ardhurat nga UEFA për shkak të pjesëmarrjes në Champions-in aktual. Mëkati i vetëm që rruga u ndal në mes në sezonin ku pritshmëritë ishin të larta.
Për këtë temë në shtëpinë e Interit flitet shpesh, më shumë se kurrë tani që në krye të këtij projekti është Stiven Zhang. Ai e di shumë mirë që zikaltrit duhet të fitojnë jo vetëm në fushë, por edhe jashtë saj. Për fitoren e titullit janë duke u menduar fanella speciale festive që mund të sjellin të ardhura të kënaqshme, por edhe të tjera miliona që do të bënin të kënaqur ekonomistët e skuadrës.
Në Milano pritet që të ketë evente të rëndësishme që do të lidhen pikërisht me festën e titullit kampion, ku një rëndësi të veçantë do të marrë triumfi në rast se vjen në derbin e Milanos, i programuar për t’u luajtur më 22 prill. Histori, rekorde dhe miliona. Në futbollin modern nuk kanë rëndësi vetëm rezultatet në fushë.
