Deputetja demokrate, Albana Vokshi kryetare e komisionit hetimor parlamentar për koncensionet në shëndetësi, tha se Edi Rama nuk ka pasur asnjë dëshirë për ngritjen e këtyre komisioneve, pasi ai i rrëzoi me forcën e kartonit.
Vokshi tha se deputetët socialist po veprojnë sipas qasjes që ka Edi Rama ndaj komisioneve hetimore, pasi ato nuk duan të zbardhin aferat, përfshi edhe këto në shëndetësi.
“Ilir Beqaj është nën mbrojtjen e Edi Ramës, shëtit në rrugët e Tiranës, madje është një rrezik edhe për prishjen e provave. Po kështu Edi Rama nuk do që të bëjmë një transparencë mbi rolin e Ogerta Manastirliut, Vilma Nushit dhe çdokujt tjetër të përfshirë në këto konçensione”, tha Vokshi.
Ajo tha se qasja e Edi Ramës ndaj hetimit parlamentar nuk ka ndryshuar, në fillim nuk pranoi të ngriheshin, ndërsa tani po i bllokon.
Vokshi tha se socialistët refuzojnë të shkojnë në komision pasi nuk duan mbledhjen, nuk duan që hetimi parlamentar të nisë nga puna.
“Të gjithë anëtarët e mazhorancës, që nuk do Edi Rama të ketë komision hetimor, janë shkelës të ligjit. Nëse një deputet mungon 3 herë rradhazi pa arsye të legjitimuara, atëherë kërkohet zëvendësimi i tyre”, tha Vokshi.
Ajo tha se Plarent Ndreca, nënkryetari socialist i Komisionit, është në konflikt të pastër interesi, pasi si avokat ka mbrojtur pikërisht personat e përfshirë në këto afera.
“Fakti që ai refuzon të firmosë deklaratën për konflikt interesi, tregon se ai do të jetë i njëanshëm. Milva Ikonomi ka qenë zv.ministre e Shëndetësisë në kohën e koncensioneve, pra është në konflikt interesi dhe ky është një provokim i hapur i Edi Ramës“, tha Vokshi per Syri tv, duke shtuar se kjo është shprehje e vullnetit të Edi Ramës për të bllokuar punën.
