Kreu i Komisionit Qëndror të Zgjedhjeve, Ilirjan Celibashi ka vendosur të mos i heqë mandatin kreut të Bashkisë së Vaut të Dejës, duke “falur” kështu një tjetër kryebashkiak socialist.
Në lidhje me vendimin, Celibashi u shpreh se “subjekti i propozuar nga PS nuk përfshihet në kushtet e ndalimit për të ushtruar funksionin publik të kryetarit”.
“Ne konstatojmë se Kristian Shkreli, kryetar i Bashkisë Vau-Dejës, i propozuar nga PS, nuk përfshihet në kushtet e ndalimit për të ushtruar funksionin publik të kryetarit, vazhdimin e mandatit të Kristian Shkrelit si kryetar i Bashkisë Vau-Dejës. Ky vendim hy në fuqi me njëherë dhe publikohet në faqen zyrtare të KQZ. Mund të bëhet ankimim në KAS prej 30 ditëve nga shpallja e këtij vendimi”, – tha Celibashi.
Në Prill të vitit të kaluar, një grup prej 15 deputetësh nga radhët e Partisë Demokratike, i kërkuan KQZ-së verifikimin e kandidatit të PS në Vaun e Dejës, Kristian Shkreli. Ky i fundit rezulton se në vitin 2021, kur ka qenë kandidat për deputet nën siglën e PS, nuk ka deklaruar dëbimin e tij nga Italia në vitin 2007, në formularin e dekriminalizimit.
Ndërkohë, në formularin e dekriminalizimit për kandidimin për kryebashkiak, Kristian Shkreli, ka deklaruar se ka ndryshuar mbiemrin nga “Shkreli” në “Kola”, dhe më pas nga “Kola” në “Shkreli”. Ndërkohë që ka deklaruar dhe se ka jetuar për disa vite ne Torino të Italisë dhe është dëbuar nga ky shtet.
Më pas, dëbimi i Kristian Shkrelit u konfirmua edhe nga Prokuroria e Përgjithshme, pas verifikimeve me shtetit italian.
“* Rezulton të jetë urdhëruar EKSPULS nga territori i shtetit italian, me vendimin nr.81/2007 të Prefektit të Provincës së Cuneos, për arsye se rezultoi i papajisur me dokumenta të rregullta qëndrimi në bazë të rregullave mbi qëndrimin e shtetasve të huaj.
* Për shtetasin shqiptar Kristian Shkreli është urdhëruar: EKSPULS (LARGIMI) NGA TERRITORI ITALIAN, konform Nenit 13, paragrafi 2 gërma b të Dekretit Legjislativ 286/98 ndryshuar me Ligjet nr. 189/02 dhe 271/04, që parashikon ekspulsin kur një shtetas i huaj nuk ka bërë kërkesë për pajisje me leje qëndrimi brenda afatit të parashikuar”– thuhej ne hetimin e prokurorise.
Kujtojmë se Kristian Shkreli u shpall fitues në zgjedhjet lokale të Majit 2023 me 55.78 % të votave.
