Në fillim të seancës së sotme plenare, Kuvendi ka miratuar futjen në rendit të ditës të projekt-ligjit Për Dhënien e Amnistisë Penale”.
Por, kjo pikë e futur në rendin e ditës është kundërshtuar nga deputeti i PD-së, Dashnor Sula, sipas të cilit, asnjë prej kolegëve të tij nuk ishte njoftuar për këtë gjë. Sipas deputetit demokrat, ky ligj nuk mund të kalojë në votim pa u kaluar më parë në Komisionin e Ligjeve.
Nikolla: Kuvendi e mori vendimin për futjen në rend dite të amnistisë.
Kujtojmë se palët politike duket se kanë gjetur dakordësinë “Për Dhënien e Amnistisë Penale” që pritet të miratohetsot në Kuvend. “Drita jeshile” u dha ditën e djeshme pas mbledhjes së grupit parlamentar të Partisë Demokratike, i cili propozoi disa ndryshime të versionit fillestar në Kuvend, të cilat u pranuan nga mazhoranca dhe u përshëndetën nga Ministri i Drejtësisë, Ulsi Manja.
Pika e parë e propozimit lidhej me ndryshimin e datës, ku falja të bëhet edhe për të dënuarit, nisjes së hetimeve apo kryerjes së veprës penale deri më 31 Mars. Po ashtu, PD propozoi që të përjashtohen nga vuajtja e dënimit dhe ndjekja penale të gjithë personat e gjykuar apo hetuar për vepra penale të kryera gjatë protestave.
Pika më e diskutueshme lidhet me ndryshimet në nenin 5, ku përfshihen edhe subjekte të Gjykatës së Posaçme kundër Korrupsionit dhe Krimit të Organizuar. Amendamenti i grupit parlamentar të PD-së përjashton nga përfitimi një grup funksionesh kushtetuese, të tillë si presidenti, kryeministri, ministra, zëvendësministra, deputetë dhe funksionarë të tjerë të lartë të drejtësisë e të ngjashme, por lejon uljen e dënimit për një seri veprash penale në kompetencë të GJKKO-së për zyrtarë të tjerë të nivelit të lartë, gjyqtarë, prokurorë apo persona fizikë të dënuar për korrupsion, abuzim me tenderat dhe të ngjashme.
Ky ndryshim në projektligj u jep ulje me 1 vit e gjysëm burg të dënuarve burra nga Gjykata e Posaçme dhe me 2 vit e gjysëm burg të dënuarve gra dhe të mitur nga e njëjta gjykatë, me kushtin që ata të mos mbajnë apo të mos kenë pasur kur kanë kryer veprën penale funksionet përjashtuese.