Gjykata e Lartë ka rrëzuar kërkesën e Jamarbër Malltezit dhe bashkëshortes së tij Argita Malltezi Berisha duke lënë në fuqi vendimin e Apelit të GJKKO-së për sekuestrimin e 25 pasurive të tyre, në kuadër të hetimeve për privatizimin e ish-kompleksit sportiv Partizani.
Vendimi është marrë nga trupa gjykuese e përbërë nga Ilir Panda, Sokol Binaj dhe Sandër Simoni, të cilët nuk kanë pranuar rekursin e bërë nga vajza e ish-kryeministrit Sali Berisha dhe bashkëshorti i saj, i cili ndodhet nën masën e sigurisë “arrest shtëpie”.
Ndonëse avokatët e Malltezit kanë argumentuar se pronat kanë burim të ligjshëm, nuk ka korrupsion, konflikt interesi apo element të pastrimit të parave, Gjykata e Lartë nuk e ka hequr sekuestron.
Sekuestrimi i 25 pasurive të paluajtshme në pronësi të tij dhe bashkëshortes, Argita Malltezi, mes tyre 6 llogari bankare, u bë me urdhër të SPAK. Jamarbër Malltezi akuzohet për vperat penale “Korrupsion pasiv të funksionarëve të lartë shtetërore ose të zgjedhurve vendorë”, kryer në bashkëpunim me Sali Berishën.
SPAK pretendon se Berisha, në cilësinë e tij si kryeministër, ka favorizuar procedurat e privatizimit të ish-kompleksit “Partizani” dhe përfitues i drejtpërdrejtë ka qenë Malltezi.
SPAK deklaron se në tokën e ish-kompleksit “Partizani”, Malltezi në cilësinë e investitorit nga shoqëria “Homeplan” sh.p.k., ka kryer ndërtime dhe përfitimet llogariten në shumën 672 miliardë lekë ose 5 milionë euro.
