Ish-deputeti i PBDNJ-së Thoma Miço thotë se kryetari i bashkisë së Himarës pas dorëheqjes së Jorgo Goros, duhej të zgjidhej nga koalicioni fitues.
I ftuar në emisionin “Open” në News24, ai deklaroi se kryetari i zgjedhur i Bashkisë së Himarës Fredi Beleri ndodhet padrejtësisht në burg.
Ai theksoi se nuk ka prova që justifikojnë masën e arrestit në burg për Fredi Belerin.
“Ishte brenda pritshmërive që të zgjidhet një kryetar/e siç u zgjodh Blerina Bala. Unë mendoj se duhej të zgjidhej nga këshilltarët e koalicionit fitues. Zonja Bala është e pavotuar, është emëruar nga Goro. Duhej të zgjidhej kryetar një person nga lista e koalicionit fitues. Nuk ka prova që justifikojnë masën ndaj Belerit.
Drejtësia ka ceduar deri tani, por jam besimplotë që drejtësia në fund do të thotë fjalën e vet. Ligji e përmban zgjidhjen për zgjedhjen e Balës, por mendoj se duhej zgjedhur një person nga koalicioni fitues”, deklaroi Miço.
