Emisioni “Stop” ishte këtë të premte në fshatin Pirg të Bashkisë Maliq, për problemin e zonjës Shyqyrie Lamçe, e cila tregon për moszbardhjen e vendimit të divorcit të djalit të saj.
Ky vendim është marrë në 1 Dhjetor 2023, por pas më shumë se tre muajsh, ende nuk është zbardhur.
“Ashtu e pa të arsyeshme ajo, është martuar dhe shikon jetën e saj. Kaq. Që në datën 20 Mars bën 2 vjet. Gjykata e Korçës i ndau, më 1 Dhjetor dhe na tha për 15 ditë do t’u vijë vendimi në Pirg dhe mbaron kjo punë”, tregon ajo.
Shyqyria tregon se ajo dhe fëmijët e djalit po penalizohen për ndihmën ekonomike, pasi djali punon ndonjë ditë në të zezë, ndërsa e shoqja e ka braktisur atë dhe fëmijët.
“Për fëmijët, ta shpie në komunë dhe të më japin atë asistencë për fëmijët. Vetëm djali punon, privat kështu, kush e merr, në të zezë. Numrin ia kemi dhënë të ëmës, por jo. Një kushëririt tonë këtu 6 vjet dhe vajta e pyeta në postë, ore Gjergji mos ka ardhur Klajdi Lamçja kështu. Kam një Lamçja tha Shyqyrie. E hapi dhe ishte ky. Ky ka 6 vjet që është ndarë e i erdhi tani. Ja ikën 2 vjet se ata gjynah, janë fëmijë.
Me gjithë fuqinë e shpirtit, do t’i rris këta fëmijë sa të kem shpirtin. Fëmijë, ja atje. Këtë e kam me bajame, atë e kam me sinozit. Këtë divan e sjell këtu dhe flemë bashkë me të dy. E priste ky i madhi. O nënë tha do vijë ajo, por e di vetë, nuk mundet të them gjë. Unë nuk ia ndaloj, ajo i ka fëmijët e saj”, tha gjyshja.
“Stop” u ndal në njësinë administrative Pirg dhe u takuam me punonjësen e Gjendjes Civile dhe administratoren shoqërore, të cilat na thanë se vendimi nuk ka ardhur në njësi, që të bëhet ndryshimi i statusit e më pas të aplikohet për ndihmën sociale.
Avokat Klaudi Zholi shpjegon se afati i zbardhjes së një vendimi, nuk duhet të kalojë 40 ditët, që parashikohen në ligj, në të kundërt kemi të bëjmë me shkelje nga ana e gjyqtarit.
“Gjykata ka një afat maksimal për të shpallur vendimin, të arsyetuar në 40 ditë. Nëse nuk zbardhet për 40 ditë atëherë quhet i shkelur afati që ka përcaktuar procedura e kodit civil”, tha ai.
Stop dërgoi pranë gjykatës së shkallës së parë të juridiksionit të përgjithshëm në Korçë një të infiltruar për të kuptuar pse nuk është zbardhur ende vendimi. Përgjigja është kjo:
Sekretaria e Gjykatës: Tani komunikova me sekretaren e Gjyqtares, ajo që keni ju është proces verbali i fundit, që vërteton, që çështja është mbyllur. Kur të arsyetohet vendimi i Gjyqtares, iu komunikohet palëve dhe pastaj vini këtu, që e merrni me formën e prerë! I komunikohet në banesë në momentin, që do dalë vendimi.
