Grupi i dialogut mes PS dhe PD, i ngritur për ligjet që kërkojnë shumicë të cilësuar votash në Kuvend, zhvilloi këtë të enjte në komisionin e ligjeve, mbledhjen e parë. Nga opozita ishin pjesëmarrës Oerd Bylykbashi, Dhurata Çupi (PD) dhe Erisa Xhixho (PL). Nga mazhoranca përfaqësuesit janë Damian Gjiknuri, Toni Gogu dhe Vasilika Hysi. Një karrige i është lënë grupit të Lulzim Bashës, por që mesa duket ka vendosur të mos jetë pjesë e kësaj strukture.
Pas mbledhjes, Oerd Bylykbashi dha detaje lidhur me atë ç’ka u diskutua në mbledhjen e parë, gjatë një prononcimi për gazetarët. Ai tha se u ra dakord mes palëve për listimin e çështjeve për tu zgjidhur. “Ajo që ramë dakord është kjo, që do të listohen dhe do të përcaktohet në një mbledhje tjetër objekti i punës. Pra kush janë çështjet prezente në Kuvend për t’u zgjidhur“, tha Bylykbashi.
Për reformën zgjedhore, u shpreh se u dakordësua që të jetë një çështje prioritare. “Ajo që u vu theksi dhe ajo që është interesi i qartë i opozitës, ajo që u ra dakord, është që çështja prioritare, e cila do të trajtohet nga ky mekanizëm dialogu është reforma zgjedhore, që përfshijnë ndryshimet në Kodin Zgjedhor, në përputhje me rekomandimet e OSBE/ODIHR-it, problematikat që kanë dalë, vendimet e Gjyaktës Kushtetuese dhe të gjitha ato çështje, që mund të prekin dhe ligje të tjera, të cilat ndikojnë në garantimin e standardeve për zgjedhjet e lira dhe të ndershme. Pra, prioritet sa i takon opozitës dhe që u ra dakord nga grupi i punës është trajtimi i reformës zgjedhore. Sigurisht më pas do të trajtohen dhe çështje të tjera, që do të listohen”, theksoi Bylykbashi.
I pyetur nëse reforma zgjedhore do të përfundojë brenda këtij sesioni, Bylykbashi tha se, “ka qenë gjithmonë çështje e vullnetit politik”, përveçse detyrim. Ai nënvizoi se do t’i drejtohen për ekspertizë edhe organizatave ndërkombëtare.
Për amnistinë penale, u shpreh se opozita e ka mbështetur gjithmonë. “Duhet të shohim zgjidhjet konkrete që të arrijë objektivat”, shtoi.
Kryetari i grupit parlamentar socialist Damian Gjiknuri tha se aministia nuk u diskutua në mbledhjen e sotme, por shtoi se në një moment të dytë “do të kalojë me konsensus”. Gjiknuri tha se ka një dialog mes grupeve parlamentare për çështjen.
Deputeti socialist shtoi se do të shkohet drejt ndryshimit të Kodit Zgjedhor “nëse do të gjejmë dakordësi mes gjithë faktorëve politikë”.
Lidhur me grupin e dialogut, theksoi se “u konstituua këtë të enjte në bazë edhe të vendimit që ka marrë kryesia e Komisionit të Ligjeve”. Ai shtoi se “thelbi (i strukturës) janë është çështje që kërkojnë konsensus në interes të integrimit të vendit në BE dhe ato që kanë interes për shoqërinë dhe kërkojnë votë të cilësuar”.
