Pas ndeshjeve të kombëtareve, fokusi është kthyer te ndeshjet e Superiores. Të premten dhe të shtunën skuadrat do të zbresin në fushën e lojës për të kërkuar 3 pikët e javës së 29-të.
Kështu ekipet kanë pasur kohë të mjaftueshme nga pauza e kombëtares për t’u përgatitur për dueli e radhës. Kjo nuk vlen shumë për Partizanin. “Demat” janë një prej skuadrave që kanë më shumë futbollistë të angazhuar me kombëtaren.
Preka, Buxhelaj, Bintsouka dhe Ismajli janë të angazhuar me kombëtaret, ndërsa Maguete ka marrë leje nga klubi për të takuar familjen. Ndërkohë nga ana tjetër Mehmeti dhe Bytyçi vijojnë fazën e rikuperimit dhe ende nuk dihet se kur do të rikthehen në fushë e lojës. Shehi pret që skuadra të plotësohet sa më shpejt dhe të ketë të gatshëm të gjithë lojtarët.
Lajme të mira vijnë nga Keko dhe Mensah, të cilët janë rikthyer të stërviten me grupin. Të dy lojtarët mund të marrin minuta në duelin me Laçin, sfidë që do të luhet në transfertë në orën 15:00 ditën e shtunë.
