Kreu i Grupit Parlamentar të PD-së, Gazment Bardhi, në takimin e zhvilluar pasditen e sotme me demokratët në Kavajë, ka folur mbi shqyrtimin e ligjshmërisë së mandatit të Olta Xhaçkës.
Bardhi është shprehur se mazhoranca po injoron Kushtetutën, duke mos lejuar që t’i hiqet mandati i deputetes Xhaçka. Sipas Bardhit, ish-ministres së Jashtme duhej t’i ishte hequr mandatin një vit më parë pasi ka bërë bashkëshortin e saj investitor strategjik dhe ka grabitur 10 mijë metra katrorë pronë për të ndërtuar një resort.
Bardhi: “Nuk dua dhe s’kam ndërmend të ndalem te qeveria Edi Rama, sepse më shumë e ndjeni ju sesa keq qeveris Edi Rama sesa ne si deputetë. Për shembull, ish-ministrja e Jashtme, bën burrin investitor strategji, grabit 10 mijë metër katrorë tokë për të ndërtuar një resort dhe sot nuk është as në burg, madje Edi Rama nuk lejon as t’i hiqet mandati, edhe pse sipas Kushtetutës, kësaj deputeteje të mazhorancës duhej t’i ishte hequr një vit përpara. Ndërsa për opozitën kemi shkelje të Kushtetutës, burgosje në shkelje të Kushtetutës, ndërsa në rastin e Edi Ramës kemi injorim të Kushtetutës, mbrojtje politike ndaj atyre që grabisin, jo pak por 10 mijë metër katrorë pronë. Ky ka qenë modeli që na ka ofruar Edi Rama dhe barra i ka rënë PD-së ta bëjë ndryshimin”, tha Bardhi.
