Policia e Durrësit ka vijuar hetimet në lidhje me ngjarjen e regjistruar në ditët e para në Durrës, ku shtetasja e huaj Darjana Linares u hodh nga kati i dytë, pas një konflikti me 39-vjeçarin nga Shijaku Ismet Zoto.
Pas hetimeve, rezultoi se e reja ushtronte funksionin e prostitucionit bashkë me 4 shtetase të tjera të huaja në një banesë të marrë me qira, por atë ditë, Ismet Zoto u prezantua si klient i saj për t’i shpëtuar burgu.
Por, pas hetimeve nga Prokuroria është vërtetuar se Ismet Zoto ishte tutori i 5 shtetaseve të huaja, i cili i shfrytëzonte ato për prostitucion kundrejt fitimit. Ai është vënë në pranga, teksa akuzohet për veprën penale “Shfrytëzimi i prostitucionit”.
Njoftimi:
Vijojnë hetimet e thelluara për të nxjerrë përpara përgjegjësisë penale, shtetasit e implikuar në një rast prostitucioni, të goditur nga Policia, më datë 6 mars 2024.
Vihet në pranga 39-vjeçari që u konfliktua me 23-vjeçaren nga Barcelona.
Ai akuzohet se shfrytëzonte për prostitucion, këtë shtetase dhe 4 të tjera të huaja, në një banesë me qira, në lagjen nr. 2, ku gjithashtu konsumoheshin lëndë narkotike.
Më herët, për rastin u proceduan penalisht 5 shtetaset e huaja.
Si rezultat i veprimeve hetimore, të kryera në drejtimin e Prokurorisë së Durrësit, për të përcaktuar plotësisht autorësinë dhe rrethanat e mbajtjes së një banese në lagjen nr. 2, Durrës, për prostitucion dhe për konsumim të lëndëve narkotike, specialistët e Seksionit për Hetimin e Trafiqeve të Paligjshme të DVP Durrës ekzekutuan urdhrin e Prokurorisë, për ndalimin e shtetasit I. Z., 39 vjeç, banues në Shijak.
Në lidhje me rastin, për këtë shtetas është caktuar masa e sigurisë “Arrest në burg”, për veprën penale “Shfrytëzimi i prostitucionit”.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.
