Janë zbardhur detaje të reja nga shpërthimi me tritol i regjistruar në orët e para të mëngjesit të kësaj të hëne tek porta e oborrit të banesës së shtetases Frida Sala, 62 vjeçe, në Shkodër.
Banesa ka qenë e monitoruar me kamera sigurie, të cilat kanë filmuar momentin kur autori ka hedhur lëndën plasëse. Ky i fundit ka qenë me motor dhe me skafandër në kokë dhe pasi ka hedhur tritolin është larguar sërish. Nga kamerat, policia nuk ka arritur që ta identifikojë autorin.
Ngjarja ka ndodhur rreth orës 03:40, në lagjen “Tom Kola”, pranë Shkollës Pyjore. Mësohet se në momentin kur është hedhur ekspozivi brenda banesës ka qenë 62-vjeçarja së bashku me djalin dhe bashkëshortin.
Në dëshminë e dhënë para grupit hetimor, pronarja e banesës Frida Sala ka deklaruar se kur ndodhi shpërthimi ishin zgjuar dhe po bëheshin gati për të ngrënë vaktin e syfyrit duke qenë se agjërojnë në këtë muaj të shenjtë të Ramazanit.
Nga shpërthimi raportohet se ka pasur vetëm dëme materiale ku është shkatërruar porta kryesore, dera e banesës, muret dhe dritaret janë thyer dhe një automjet që ndodhej i parkuar është dëmtuar.
Mësohet se 62-vjeçarja Frida Sala raportohet se punon në pikën kufitare të Hanit të Hotit, ku peshon mallrat që hynë e dalin në doganë. Në dëshminë e dhënë ajo ka deklaruar se nuk ka konflikte me askënd.
Gjithsesi, burime pranë grupit hetimor bëjnë me dije se Frida Sala del në pension për pak muaj dhe policia për momentin nuk e lidh ngjarjen me punën e saj.
Në pyetje është marrë edhe djali i saj, i cili ndoedhej në banesë, Dori Sala. Ky i fundit mësohet se po ashtu ka deklaruar se nuk ka konflikte me askënd dhe se nuk e di se kush mund të jenë autorët. Ai punon në një kompani interneti dhe nuk njihet si një person problematik.
Ndërkohë, djali tjetër i Frida Salës ndodhet në Itali dhe punon si shofer kamioni. Ende nuk dihen arsyet që mund të kenë çuar në vendosjen e tritolit.
Policia dhe prokuroria e Shkodrës vijojnë hetimet për zbardhjen e plotë të kësaj ngjarje të ndodhur në Shkodër, si dhe për identifikim dhe kapjen e autorit.
