Suzana Isufaj, zonja nga Durrësi prej shumë vitesh është emëruar nga fisi i saj si përfaqësuese e pasurive të paluajtshme, të regjistruara në emër të tyre si bashkëpronarë. Por kohët e fundit kanë lindur disa konflikte.
‘Jam bashkëpronar për ca toka që kemi të trashëguara në Ksamil nga stërgjyshi jonë Hajro Cini. Jemi 25 veta në bazë të aktit të trashëgimisë. Për këto prona i kemi dhënë të drejtë përfaqësie Suzanës dhe Hajros, të cilët janë edhe bashkëpronarë. Përfaqësia ka qenë vetëm për të ndjekur pronat, të nxjerrë certifikata, të bëhen padi, ndjekur çështje gjyqësore, por asnjë lloj përfaqësie për të shitur dhe dhënë më qira.
Në 2023 erdha në Shqipëri, pasi mora përfaqësi nga babai për të ndjekur pronat. Shkova te Ministria e Drejtësisë për të marrë vesh kontratat, që janë bërë në emër të Agron Goles dhe mora përgjigje që është bërë një kontratë qiraje.
S’kemi qenë në dijeni dhe e kam marrë vesh vetëm nga ministria, 2 vite më pas. 2 vite kanë bërë veprime që s’i dinim.Kanë shfrytëzuar tokën dhe ne s’na kanë informuar’- sqaroi Silvi Golja, bashkëpronar.
Lidhur me këto akuza zonja Suzana nuk tregoi në asnjë moment se përse i kaloi kompetencat e saj, duke mos i njoftuar bashkëpronarët për veprimet e ndërmarra, por u justifikua me faktin që ata nuk kishin paguar detyrime financiare.
Për këtë bashkëpronarët dhanë një tjetër argument duke sqaruar se për të mbuluar shpenzimet i kanë dhuruar me prokurë pjesën e një nga bashkëpronarëve, Duro Ciniut.
‘Pjesa e xhaxhait ishte 8%. U ra në një konsensus që ajo pjesë do lihej për shpenzime avokatie për procedura. Por as Silvi, as Kamelja nuk kanë lidhje me pjesën e Duro Cinit dhe për këtë jam në proces gjyqësor.’- kundërshtoi Suzana.
Lidhur me përdorimin e prokurave në mënyrë të paautorizuar, avokati Alban Duraj mbajti qëndrimin e tij.
‘Përsa i përket këtyre veprimeve ajo nuk duhet t’i kishte ndërmarrë, se zonja ka nënshkruar për llogari të bashkëpronarëve të tjerë, të cilët nuk ja kanë deleguar tagrat për ta dhënë me qira. Tejkalimi i parë që ka bërë, e cila ishte e autorizuar vetëm për veprime të caktuara dhe jo për ta dhënë me qira pronën. Së dyti, kemi të bëjmë me veprën penale të mashtrimit.
Përveçse ka mashtruar kompaninë, me të cilën ka lidhur kontratën e qirasë, ka përvetësuar, pra kemi dhe veprën penale të vjedhjes, sepse pagesat të cilat i ka marrë nga kjo kompani i ka kaluar në llogari të vet dhe s’i ka njoftuar bashkëpronarët që përfaqësonte me prokura. Ajo duhet t’i kishte njoftuar dhe kaluar pagesat e marra.
Duket hapur që i ka vjedhur këto pagesa. Ka shpërdoruar besimin e bashkëpronarëve dhe ka mashtruar ata.’/Emisioni “Piranjat”
