Ndryshimet në buxhetin e vitit 2024 dhe 400 milionë dollarët që do të shkojnë për ndertimin e portit të ri në Porto Romano, kthyen në Kuvend debatet për aferën e portit të Durrësit.
Vendimi i qeverisë për të financuar me paratë e qytetarëve, portin e ri tregtar, pasi i fali portin ekzistues privatit, ishin në fokus të fjalimeve të deputetëve demokratë në Kuvend.
Nënkryetari i PD, Oerd Bylykbashi deklaroi se investimi për portin e ri tregtar, nga buxheti i shtetit, deri në fund mund të prekë vlerën e 2 miliardëve dollarë.
“400 milionë dollarë në tre vitet e ardhshme do u grabiten xhepave të shqiptarëve për të ndërtuar portin e ri në Porto Romano. Nga buxheti i shtetit, që do të thotë nga taksat e shqiptarëve. Doli Rama në fillim e tha do e bëj investim publik, pastaj tha se do jetë me kredi. Në një moment tha se do e bëj me të ardhurat e portit. Ishte gënjeshtra tjetër. Për të ardhur te ajo që ishte qëllimi.
400 milionë dollarë për një port, i cili nëse nuk do të kishte bërë kontratën hiperkorruptive, antikushtetuese, që ia dha një kompanie private me veshje arabe, ku janë të gjitha interesat korruptivë, nga kryeministri e poshtë, porti i Durrësit nuk kishte nevojë të ndërronte vend. Të gjitha vlerësimet shkojnë nga 1.2 miliard deri në 1.7 miliard, ndoshta shkon edhe 2 miliardë porti i ri. Ndërkohë kemi një port që ekziston prej më shumë se 2700 vitesh dhe e zhdukim sot” – tha Bylykbashi.
