Nga Basir Çollaku
Kokaina dhe bananet janë mollë e ndaluar për policinë. Shkojnë lehtësisht në destinacion, nga Porti i Durrësit me dorëzim të kontrolluar te porositësit. Kilogramët janë harruar. Flitet vetëm me tonelata, një dy, tre, apo katër, ngarkesat e fundit rreth një muaj më parë, etj.
Grupet janë acaruar. Pazaret po prishen. Dhuna po shfaqet në komunikimet e fundit gjithnjë e më shpesh. Në Shkodër, në Bllok, në Fier e këtë muaj në Pogradec. Sekretet nuk po qëndrojnë më mbuluar, tensionet janë rritur ndjeshëm dhe vëlla Olsi shfaqet shpeshherë duke dhënë porosi e herë të tjera duke dhënë llogari, për ngjarje jo fort rozë. Olsi, që me fitoren socialiste të të vëllait në 2013-ën la Amerikën dhe erdhi në Tiranë ku gjeti SuperAmerikën.
“Le të hanë kokat e njëri-tjetrit”, profetizonte Edi Rama, kur bandat nisën krehjet e përballjet, duke asgjësuar ushtarët mes palëve e ai shtetari qeveritar bënte sehir nga halli, më shumë se sa nga meraku.
Me trashjen e zullumeve shfaqet gjithnjë e më shpesh emri i Olsi Ramës, herë si garanci e herë si porosi, duke tentuar në jo pak vende ujdi pushtetesh. Por, vëlla-Kryeministri, nga viti 2013, kur priu Aleancën e ftuar të qelbësirave, për të marrë e bashkëndarë pushtetin është në vorbullën e ndikim-përfitimit, sa elektoral, aq edhe ekonomik të botës gri dhe të zezë në Shqipëri.
Tani Rama është në një gjendje ku, Ai dhe Ata, nuk e lëshojnë dot njëri-tjetrin, sepse ortakëria, borxhet, investimet, dhe ndarjet e pjesëve takuese, nuk janë përfunduar, por gjithnjë e më tepër janë fortkomplikuar. Njëra palë përdor paligjshmërisht ligjin, duke ndërtuar infrastrukturën dhe shtratin e fasadës e pala tjetër ka gjuhën e forcës, atë të armëve, duke mos marrë parasysh asgjë. Kush del në rrugën e parave e bëhet pengesë, duke shkelur kontratën, ndëshkohet sipas kodit të mbipalëve. Arma. Përfshirja ka nisur herët, por toleranca është në limite ekstreme.
Në shtator 2015, kur partnerët donin bindjen detyruese, por të munguar prej 5 vitesh të Ramës për Reformën në Drejtësi, “rrodhën” raportin për 200 milionë euro të KM, të qeverisur nga vëlla Olsi në USA, nëpër offshore e pasuri të patundshme.
Në 2019, europianët në një dosje të madhe me fillesa nga Spanja sollën sërish emrin e Olsi Ramës, të përfshirë me ortakërinë e bizneseve të tij në call centerat financiarë, ku mashtrimi ishte në miliarda euro.
Legjendat urbane nuk e përjashtojnë Olsin nga afria me lojërat e fatit, ku një re e zezë, zhdukja e ish-kryelojtarit të këtij biznesi të basteve, Ervis Martinajt, mban disa deklarata të Kryeministrit Edi Rama, për dijeni e drejtësi.
Opozita në vitin 2021 akuzoi publikisht se Olsi Rama, kishte shkuar e qëndruar disa kohë në Shkodër, si garanci në zgjedhjen e Benet Becit. Ekipi tij zgjedhor ishin Bajrat, Pëllumb Gjoka, investitori strategjik i firmosur nga Kryeministri Edi Rama, tashmë biznesmen në qeli, i akuzuar ndër të tjera për vrasje.
3.8 miliardë euro para trafiqesh në investime në Shqipëri, tonelata drogë kokainë kalojnë çdo filtër sigurie në Portin e Durrësit e shpërndahen mes bandave, si të ishin fasule.
DEA në Tiranë, normal ia ka bërë të ditur Ndihmës Sekretarit në Byronë Ndërkombëtare të Narkotikëve, Tod Robinson, mbërritur në Tiranë dje, duke thartuar Ramën e ofruar pamjet e tonelata dosjeve në takimin me Altin Dumanin.
Javë më pare, në informacione të pabotuara gëlonte një përplasje e dhunshme të fortësh, në një lokal në bllok, për pabesi garantuesish afër oborrit të kryeministrit, pasi ishte bërë kurban një kundërshtar financiar dhe politik.
Dy javë më parë një incident tjetër mes grupeve me ndikim të madh në pushtet dhe biznes dhe botën gri, disa aktorë të historisë së mëparshme në Bllok në Tiranë, ka ndodhur në Pogradec. Përplasja e mbi 10 personave ka qenë agresive.
Pyetja është? Po Olsi Rama, vëllai i Kryeministrit, a ka qenë në këtë mjedis ku nuk janë kursyer palët në përballje fizike ?! Dëshmitarët janë të kursyer, sepse nuk duan të blejnë belanë ndërsa policia ka kujdestar Taulantin, që fjala sheshit të mos dalë.
