Gjykata e Apelit ka lënë në fuqi vendimin e gjykatës së Shkodrës, që vendosi ekstradimin e rusit në kërkim ndërkombëtar Igor Kokunov.
I njohur me nofkën “hajduti”, 59-vjeçari u arrestua në pikën e kalimit Kufitar Muriqan Shkodër, më 26 Gusht 2023.
Ai është shpallur në kërkim ndërkombëtar nga Interpoli i Moskës, referuar një vendimi dhënë nga gjykata e kryeqytetit rus. Më 18 Shkurt 2022, gjykata ruse ka caktuar ndaj tij masën e sigurimit “arrest në burg”, si i dyshuar për kryerjen e veprës penale “Marrja e një pozicioni më të lartë në hierarkinë kriminale”, parashikuar nga neni 210/1 i Kodit Penal i Republikës së Rusisë dhe që parashikon një dënim maksimal me 15 vjet burgim.
Më 14 Nëntor 2023, gjykata Shkodrës vendosi lejimin e ekstradimit të “hajdutit” drejt Rusisë, ndërsa nuk pranoi kërkesën për azil politik në Shqipëri të rusit. Ky i fundit pretendoi në gjykatë se proceset gjyqësore ndaj tij në Rusi janë stimuluar për shkak të marrëdhënies jo të mirë që ka ai me regjimin e Presidentit Vladimir Putin.
Vendimi i shkallës së parë u ankimua nga Kokunov. Këtë të mërkurë, gjyqtarja e Apelit Lutfije Celami, la në fuqi vendimin e shkallës së parë.
