Pavarësisht se shqiptarët vazhdojnë të largohen çdo ditë ditë nga vendi për shkak të korrupsionit dhe varfërisë, kryeministri Edi Rama pretendon se ka bërë 29,225 anëtarësime të reja.
Gjatë fjalës së tij në asamblenë e PS-së, që e ka mbledhur në një resort në Gjirin e Lalzit, Rama falenderoi “patronazhistët” e PS-së pë këtë arritje, teksa u vendosi si objektiv që deri në qershor shifra të ketë arritur deri në 50 mijë anëtarësime të reja.
“Dua t’i përgëzoj për përfshirjen aktive për ripërtritjen e partisë sonë, në këtë proces të rienergjizimit i cili ka prekur çdo organizatë socialiste. Dua të përgëzoj sekretarin Blendi Klosi për risinë e inxhinierimit të këtij procesi. Sot në regjistrin digjital të anëtarësisë socialiste numërohen plot 29.225 anëtarësime të reja. Duam 50 mijë anëtarë të rinj deri në qershorin e këtij viti. Domethënë edhe 20 mijë e pak që u shtohen këtyre që janë shtuar deri tani. E keni vënë re se sa me shumë lehtësi janë tejkaluar objektivat, pasi nuk kemi pritur që njerëzit të vijnë te ne, por kemi shkuar ne te ata. Objektiva e dytë është rishikimi i përbërjes së çdo organizate socialiste me qëllim harmonizimin e përbërjes së secilës organizatë me profiling politike dhe social të zonës që mbulon organizata socialiste”, u shpreh Rama.
Kreu i qeverisë kërkoi nga të vetët që të vazhdojnë punën derë më derë, për t’u treguar shqiptarëve se PS është alternativa e vetme qeverisëse përballë një opozite “të dërrmuar”, siç i cilësoi ai rivalët. Rama tha më tej se u duhet një PS më e rinuar dhe me gjak të ri.
