Hetimet për vrasjen e të riut shqiptar, Kasem Kasmi, vazhdojnë të pandërprera nga hetuesit e policisë së Frosinones, për të rindërtuar motivin e saktë të tragjedisë që tronditi një provincë të tërë.
Trupit të viktimës i është kryer edhe autopsia, rezultatet e së cilës pritet të marrin deri në 60 ditë kohë.
Një ndihmesë të madhe hetimeve në lidhje me këtë ngjarje pritet t’i japin 3 telefonat e shqiptarëve, ndërsa autori nuk kishte një telefon me vete.
Informacionet që mund të merren nga telefonat pritet të përcaktojnë shkaqet e kësaj ngjarje, nëse ka pasur konflikte të mëparshme mes dy grupeve.
Ndërkohë, hipoteza kryesore mbi të cilën hetuesit po përqendrohen, ka të bëjë kryesisht me paratë. Korrikun e kaluar, në shtëpinë e Mikea Zakës u gjetën 20 mijë euro cash dhe versioni i dhënë nga vrasësi, në lidhje me një grindje mes grupeve për çështje që lidhen me një grua, duket se nuk ka asnjë bazë.
Hipotezat e tjera, nga droga te prostitucioni, ende nuk janë përjashtuar plotësisht nga autoritetet italiane.
I arrestuari, i cili ndihmohet nga avokati Marco Maietta, është mbrojtur duke pretenduar se ishte sulmuar nga grupi i Kasmit dhe se kishte qëlluar nga frika
Ndërkohë, arma e vrasjes, e kërkuar prej kohësh nga policia dhe zjarrfikësit në tymrat e Cosa në zonën e urës Via Verdi, nuk është gjetur.
