Dy persona kanë mbetur të plagosur me armë zjarri në fshatin Grudë të Shkodrës, mbrëmjen e kësaj të marte. Të lënduarit janë Gjergj Ndershtiqaj, 28 vjeç, efektiv policie i zonës (njëkohësisht student i Akademisë së Sigurisë për gradën oficer) dhe kunati i tij Gjon Nika.
Të lënduarit janë transportuar në spital për të marrë ndihmë mjekësore. Burime nga bluzat e bardha thanë se të plagosurit kanë marrë disa plagë në gjymtyrë, por janë jashtë rrezikut për jetën.
Autorët ndërkohë kanë arritur të largohen nga vendngjarja pas atentatit. Një makinë e djegur është gjetur nga policia jo larg vendngjarjes. Dyshimet janë se mjeti është përdorur në atentat.
Ngjarja
Nga hetimet e para, efektivët besojnë se shënjestra e atentatit ishte Gjon Nika.
“Rreth orës 19:30, në afërsi të një lokali në fshatin Grudë e Re, është qëlluar me armë zjarri shtetasi Gj.N., rreth 30 vjeç. Si pasojë e të shtënave është plagosur edhe kunati i tij, shtetasi Gj N., 28 vjeç, student në Akademinë e Sigurisë. Të dy këta shtetas janë transportuar në spital, për ndihmë mjekësore”, bëri me dije policia e Shkodrës në një njoftim paraprak për ngjarjen.
Ndërkaq, burime pranë grupit hetimore thanë se dy të plagosurit bashkë me një tjetër person (i cili nuk është lënduar) kanë qenë në bordin e një automjeti, kur janë qëlluar me armë zjarri. Qitësit dyshohet se kanë qenë dy, ndërsa në vendngjarje janë gjetur një sasi e konsiderueshme plumbash. Ngjarja ka ndodhur afër një lokali i cili ka kamera sigurie dhe policia po bën këqyrjen e tyre.
Makina e djegur
Gjatë kontrollit të zonës, efektivët kanë konstatuar duke u djegur në afërsi të vendit të ngjarjes një automjet tip “Renault”, i cili dyshohet se është përdorur nga autorët.
Në flakë është gjetur dhe makina me të cilën lëviznin të plagosurit, ndërsa dyshohet se i është vënë zjarri nga autorët.
Burime zyrtare nga blutë thanë se në drejtim të vendit të ngjarjes janë nisur shërbimet e Policisë, drejtuesit e Drejtorisë Vendore të Policisë dhe të Komisariatit të Policisë Shkodër, si edhe disa grupe të Forcës Kombëtare të Sigurisë dhe të RENEA-s dhe specialistë nga Departamenti i Policisë Kriminale në Policinë e Shtetit.
Ndërkohë, një grup hetimor është ngritur për zbardhjen e ngjarjes nën drejtimin e prokurorisë së Shkodrës.
Drejtuesi i Policisë, Muhamet Rrumbullaku ka shkuar gjithashtu në Shkodër pas ngjarjes, ku ka zhvilluar një takim me strukturat.
