Qindra pasagjerë shqiptarë kanë mbetur në aeroportin e Athinës pasi fluturimi drejt Tiranës u anulua në minutë të fundit dhe pa asnjë sqarim nga kompania Wizz Air.
Një qytetar shprehet për mediat se avioni që ishte parashikuar që të nisej drejt Tiranës në orën 13:35, është shtyrë. Pasagjerët, pasi kaluan kontrollin dhe shkuan me autobusë drejt avionit, i rikthyen sërish në aeroport pas disa minutash pritjeje në pistë.
Mes qytetarëve të bllokuar në aeroportin grek, ka dhe shumë fëmijë, ndërsa kompania nuk iu ka dhënë asnjë sqarim se kur do të niset avioni drejt Tiranës.
Sakaq kjo nuk është hera e parë që kompania Wizz Air shfaq shqetësime të ngjashme tek pasagjerët.
Problematikën e sotme, e ka konfirmuar edhe vetë kompania “Wizz Air”, e cila iu kërkon ndjesë klientëve në një reagim të sajën.
“Fluturimi i Wizz Air nga Tirana në Athinë më 11 mars u vonua për shkak të kushteve të këqija të motit (stuhisë) në Tiranë, duke shkaktuar si pasojë vonesë të fluturimit të kthimit nga Athina në Tiranë. Fluturimi u nis nga Athina me pak më shumë se 2 orë vonesë. Wizz Air kërkon ndjesë për çdo shqetësim të shkaktuar dhe thekson se siguria e pasagjerëve, ekuipazhit dhe avionit është prioriteti i saj më i madh.” – thuhet në njoftimin e kompanisë.
