Donald Trump ka premtuar të shkurtojë fondet e SHBA-së për Ukrainën nëse ai fiton zgjedhjet presidenciale në nëntor, ka pohuar kryeministri hungarez Viktor Orban.
Dy politikanët, të cilët prej kohësh kanë pasur marrëdhënie të mira, u takuan në pronën e ish-presidentit Mar-a-Lago në Florida të premten.
Orban zbuloi detaje të diskutimit në një intervistë me transmetuesin hungarez M1 të dielën, duke thënë se “Donald Trump nuk do të japë asnjë qindarkë për luftën Ukrainë-Rusi” nëse ai rikthehet në Shtëpinë e Bardhë.
“Nëse SHBA nuk do t’i sigurojë paratë, evropianët vetë nuk do të jenë në gjendje ta financojnë këtë luftë dhe atëherë lufta do të përfundojë,” shpjegoi ai.
Trump ishte “presidenti i parë i SHBA në një kohë të gjatë pa luftë. Ne e dimë nga presidenca e tij se ai është një njeri i paqes dhe ai nuk e fsheh mendimin e tij edhe tani, ai e ka thënë qartë se qëllimi i tij është të sjellë paqe në luftën ruso-ukrainase”, tha Orban.
Kryeministri theksoi gjithashtu se qeveria hungareze nuk dëshiron “asgjë më shumë se paqe dhe armëpushim dhe një fund të kësaj lufte që ngadalë po shkon drejt fundit”.
