Lefter Maliqi shprehet se kryebashkiaku u Kuçovës, Kreshnik Hajdari do të largohet me turp nga posti që mban. Në një postim në rrjetet sociale, Maliqi shkruan se në bashkinë e drejtuar nga Hajdari po penalizohen punonjësit e ndershëm dhe po favorizohet të tjerë, që sipas tij, as nuk paraqiten në punë.
“I dënuari Hajdari, pengu i ish-fatorinos Salillari s’di ku është vet! Merr leje për Muajin Mars dhe shkon në 4 pa 10 në pune; iu heq 40 punonjësve ditën e punes pse ikin 10 min përpara; ndërkohë që disa të tjerë marrin rrogën e nuk venë fare në punë ose vetëm ‘sa bëjnë taaa’. Punonjësit e ndershëm të Bashkisë Kuçovë, të grabitur më “14 Maj”, jo vetëm që kanë pagat më të ulëta dhe kushtet e punës mizerabël, por u heq edhe ditën e punës. Njeri i vogël në shpirt, cinik, krahason jetesën e tij me Miliona e Miliarda, të abuzimeve me tendera korruptivë, me pagën me djersë të punonjësve seriozë e hallexhinj”, shprehet ish-kandidati i opozitës për Bashkinë Kuçovë, në zgjedhjet lokale të 14 majit 2023.
Maliqi shton se Hajdari do të thirret shumë shpejt sërish në Prokurorinë e Posaçme dhe shpreh bindjen se ai do të largohet me turp nga posti i kryebashkiakut.
“Hajdar, karrigia e dhuruar pa garë, 5 vjet me parë dhe e vjedhur 1 vit më parë, nuk gëzohet, bindu për këtë; do ikësh nga ajo karrige me turp ose me byzylykë në duar. Megjithëse u bë kohë, që s’po thirresh përsëri në “SPAK”, shumë shpejt do të kesh Fletë-thirrjet e radhës. Kushdo që abuzon me taksat dhe votat e qytetarëve, e pret ndëshkimi i rëndë ligjor, pavarësisht mbrojtjeve nga Oligarku apo aferat; ato dosje nuk mbyllen kurrë; do të rihapen deri sa të shkojë haka e popullit në vend. Edhe paratë do t’i gjejmë kudo që t’i kesh fshehur, mos kujto se do ja mbathësh nga Kuçova apo vendi se do i kthesh një ditë”, përfundon ai.
