Gjykata ka caktuar masën e sigurisë “arrest me burg” pa afat për 54-vjeçarin Agron Puka, i cili ra pre e një atentati mëngjesin e 6 Marsit, në afërsi të shkollës “Marash Gjoni” në fshatin Rrillë të Lezhës dhe për pasojë mbeti i plagosur.
Agron Puka është njohur me masën e sigurisë në spitalin e Traumës në Tiranë, ku po merr mjekim që prej ditës kur ndodhi atentati.
Në deklarimet e tij para togave të zeza, 54-vjeçari mësohet të ketë thënë se ka qëlluar për vetëmbrojtje, pasi tre përsona i kishin zënë pritë sapo la fëmijët në shkollë.
Kujtojmë se Agron Puka u arrestua, pasi kamerat e sigurisë zbuluan se ai iu është kundërpërgjigjur me armë zjarri autorëve, pasi mbante me vete një pistoletë pa leje.
Si autor të atentatit, janë shpallur në kërkim shtetasit Vincens Tuku, 32 vjeç, banues në fshatin Tale, Amarildo Kola, 31 vjeç, banues në fshatin Tale dhe Kevin Ndoka, 18 vjeç banues në Shëngjin. Ata akuzohen për veprat penale “Vrasja me dashje”, mbetur në tentativë dhe “Mbajtja pa leje dhe prodhimi i armëve, armëve shpërthyese dhe i municionit”.
Sipas Policisë, ngjarja ka ndodhur për shkak të një konflikti të mëparshëm.
