Policia e Tiranës ka goditur dy raste të ndryshme të armëmbajtjes pa leje dhe ka arrestuar dy persona.
Në pranga u vunë Edevaldo Haxhiu, 39 vjeç, banues në Tiranë dhe Azemvllasi Elezi, 34 vjeç, banues në Vorë.
“Shërbimet e Sektorit të Forcës së Posaçme ‘Shqiponja’, në rrugën ‘Frang Bardhi’, kanë ndaluar automjetin me drejtues shtetasin Edevaldo Haxhiu, 39 vjeç, banues në Tiranë. Gjatë kontrollit fizik dhe të automjetit, shërbimet e Policisë, i gjetën 39-vjeçarit, një armë zjarri pistoletë me krëhër e municion luftarak, dhe një sasi lënde të dyshuar narkotike kokainë”, njoftoi policia.
“Shërbimet e Komisariatit të Policisë Nr. 7, në Marqinet, kanë ndaluar për kontroll automjetin me drejtues shtetasin M.M., dhe pasagjer shtetasin Azemvllasi Elezi, 34 vjeç. Pasagjeri në momentin e ndalimit, nuk i është bindur urdhrave të punonjësve të Policisë, por ka tentuar të largohej dhe gjatë tentativës për tu larguar ka hedhur në tokë një armë zjarri pistoletë”, shtuan të njëjtat burime.
Dy armët e zjarrit me krëhra e municion luftarak, së bashku me lëndën e dyshuar narkotike kokainë, u sekuestruan në cilësinë e provës materiale.
