Igli Tare nuk do të largohet nga kampionati Italian edhe pse emri i tij është përfolur në skuadra të ndryshme, mes tyre Tottenham në Premier League.
Mediat italiane bëjnë me dije që ish-futbollisti ka piketuar skuadrën e radhës në të cilën do të marrë rolin e drejtorit sportive. Bëhet fjalë për kampionët në fuqi të Italisë, Napolin, ku në ditët në vijim do të vijë dhe konfirmimi. Vetë Tare është takuar me presidentin De Laurentis, ku kanë gjetur gjuhën e përbashkët për nisjen e një rrugëtimi të ri.
50-vjecari ishte pjesë e Lazios, si futbollist e më pas si drejtor teknik, skuadër në të cilën qëndroi për 15 vite, ndërsa bëri një punë të jashtëzakonshme. Afrimet apo dhe vendimet e tjera të marra bënë që ai të vlerësohej maksimalisht nga presidenti Lotito, por dhe nga opinion sportiv në Europë.
Në anën tjetër, tek Napoli gjërat nuk po shkojnë siç duhet, nga shpallja kampion në vitin e shkuar tek gara për të siguruar një vend në kupat e Evropës. Skuadra nuk po përgjigjet në mënyrën e duhur, teksa problem nuk shihet tek trajneri, por më lart, aty ku pritet që Tare të sjellë ndryshimin, por deri në zyrtarizimin e lëvizjes, situata do të jetë e njëjtë.
