Bardheblutë e Erbin Fagut vijnë pas atij kualifikimi dramatik me Teutën në Kupë dhe “të etur” për pikë do të mundohen të hipotekojnë vetëm 3 pikë.
Në këto kushte dueli Tirana-Egnatia pritet të prodhojë spektakël dhe emocione, aq më tepër që përballë do të jenë dy ekipe të cilat kanë numrin më të lartë të golave të shënuar këtë sezon, plot 44.
Ndryshe nga dy fazat e para, këtë herë ky duel interesant i gjen një nga ekipet jashtë zonës së “Final 4”.
Tirana ka rrëshqitur në klasifikim dhe tashmë i duhet të djersijë për të rifituar zonën që i mundëson shanset për të tentuar titullin kampion.
E gjendur në këtë situatë, rekordmenët e Superiores janë të dënuar për të fituar kundër Egnatias. “Thembra e Akilit” për ekipin e Fagut është mbrojtja ku kryeqytetasit kanë pësuar 41 gola në 26 takime.
Shumë për një ekip, i cili synon të ngre lart trofe aq më tepër që këtë fundjavë përballë do të ketë një skuadër si bardhëjeshilët, të cilët kanë dëshmuar se kanë stabilitet në çdo repart.
