Nga Boldnews.al
E ç’tmerr të madh psikologjik kaloi kryeministri ynë nja pesë vite më parë. Atje në Paris, katedralja e famshme “Notre Dame”, që mbartte brenda besim e histori të Francës, u dogj pjesërish nga një zjarr aksidental. Rama këtu tek ne, si një njeri i shëtitur e kulturaxhi i madh, qau, u prek thellë, ngërçi në fut e kaploi, teksa shihte pamjet e tmerrshme, shuka loti shkonin në analet e syve por e përmbajti disi veten. Po ashtu nuk vonoi as reagimi i kryebashkiakut Erion Veliaj, që me dhimbje të thellë shkroi ca fjalë zemre për homologun e Paristit. Rënko Rama e teshti Veliaj…
Për atë zjarr, të dy këta dashnorë të kulturës shprehën trishtim, ndërsa sot djegin për së gjalli Muzeun Historik Kombëtar, sigurisht pasi kanë varrosur me duart e tyre edhe godinën e Teatrit Kombëtar. A ka ndonjë shtet në këtë Europën e madhe që nuk ka Muze Historik Kombëtar? Sigurisht që jo, përveç Shqipërisë dhe jo pak por për katër vite me radhë drynjtë e rinj do të kyçin llozat e ndryshkur për t’i hapur udhë betonit në emër të “rikonstruksionit të plotë”. Me argumentin pa sens se godina është dëmtuar nga tërmeti i 26 nëntorit 2019, u vendos nga qeveria që të mbyllet Muzeu Historik Kombëtar.
Ajo ndërtesë në qendër të Tiranës nuk u përfshi në objekt me rrezik të lartë nga dëmtimet e tërmetit. Ka funksionuar më shumë se 5 vite pas lëkundjeve të forta, por vjen një ditë që në emër të rikonstruksionit, objekti më i vizituar në vend nga turistët e huaj, por edhe nxënësit e shkollave në mbarë vendin do të kyçet për të paktën katër vite. Paradoksalisht nuk është përcaktuar qoftë edhe përkohësisht një tjetër godinë që të shërbejë si Muze Historik Kombëtar deri në rikonstruksionin e plotë të objektit aktual.
Jemi një vend pa histori dhe kjo nuk është aq e paqëllimtë, përkundrazi, duket diçka e mirëmenduar. Për pushtetin aktual, historia nis me ta, duke i venë kazmën, fadromën e tritolin çdo objekti me vlerë aktitekturore dhe kulturore, veçanërisht në Tiranë. Godina e Teatrit Kombëtar u shemb nga dyshja Rama-Veliaj, pavarësisht reagimit të artistëve dhe shumë qytetarëve të Tiranës të cilët ditën e protestës gjatë dhe pas shembjes përfunduar nën çizmen e policisë që atëkohë të mbyste edhe me gaz lotsjellës.
Trashmë mbyllin edhe Muzeun Historik Kombëtar dhe jo pak por për katër vite, aq kohë sa mund të shërbejë për të bërë tunele nëndetare dhe jo rikonstruksionin e një godinë që mbahet mirë, paçka manipulimeve nga “ekspertët inxhinierë” që kanë ngjyer duart në sahanin e bollshëm të pushtetit.
Paradoksalisht, me një tallje malinje Rama duket kujtuar për “trishtimin” e pesë viteve më parë për katedralen në Paris… Thellesisht i prekur i shkroi atëkëho edhe Emanule Macronit. Gati sa nuk u mblodhën të gjitha bashkë pushtetarët e të ulnin flamurin në gjysmë shtizë, nga kjo dramë madhore që vërtetë nuk ndodhi këtu, por si “kulturëdashës me damke”, si Rama ashtu edhe Veliaj aktronin bukur në Notre “Dramën” e tyre. Qeveria jonë lëvroi 100 mijë euro për reastaurimin e “Notre Dame”… Sigurisht që nuk ia ndjeu për rikonstruksionin e shpejtë të godinës së Muzeut Historik Kombëtar gjithnjë nëse vërtetë do kishte probleme me strukturën. Muzeu Historik Kombëtar tashmë e ka pësuar nga historia e histerizmit të betonit…!
