Muzeu Historik Kombëtar ka njoftuar mbylljen e dyerve për një periudhë 4-vjeçare.
Në një njoftim në rrjetet sociale, thuhet se muzeu do të jetë i mbyllur nga 15 Marsi 2024 deri më 15 Mars 2028, për qëllim restaurimi.
“Të nderuar drejtues të agjencive turistike, drejtues të tureve kulturore dhe palë të tjera të interesuara, ju bëjmë me dije se: Në kuadër të zbatimit të projektit ‘Restaurimi, rikonstruksioni dhe muzealizimi i Muzeut Historik Kombëtar, Tiranë’, Muzeu Historik Kombëtar do të jetë i mbyllur për vizitorët për periudhën 15 Mars 2024 deri më datë 15 Mars 2028”, thuhet në njoftimin publik të Muzeut Historik Kombëtar në rrjetin social “FB”.
Në komentet e postimit, vihet re një habi nga ana e komentuesve për periudhën kohore që institucioni kulturor ka lajmëruar mbylljen me qëllim restaurimin.
“Seriozisht e keni? 4 vjet restaurimi? Po fjala ‘muzealizim’, ç’do të thotë? Nejse, kur të hapet Muzeu, unë qenkam 97 vjeç…”, shprehet një qytetar.
Një tjetër ngre dyshime për ngritjen e një kulle në tokën ku aktualisht është muzeu: “Do bohet na i kull aty…hajt mo i kull mo shum i kull mo pak”.
“3 vjet a thua se po e ndërtojnë nga e para”, është komenti i radhës.
“4 vjet….”, shkruan dikush.
