Deputetja demokrate Ina Zhupa i është përgjigjur ministres së Turizmit dhe Mjedisit Mirela Kumbaro në lidhje me ligjin për Zonat e Mbrojtura.
Kumbaro i quajti dritëshkurtër, ndërsa deputetja e PD-së nuk e kursen duke thënë se Kumbaro duhet të dilte në televizione për të lajmëruar dorëheqjen e saj.
“Të gjithë duhet të kemi shumë respekt për botën e biznesit sepse janë ata që investojnë, krijojnë punësim dhe sjellin të ardhura për buxhetin e shtetit. Të anatemosh ata njerëz që investimet e tyre i hedhin në këto sektorë, do të thotë në radhë të parë të jesh dritëshkurtër ose nuk e duan këtë vend. Unë nuk besoj se ka shqiptar që nuk e do këtë vend, kështu që rrimë tek dritëshkurtësia”, tha Kumbaro.
Zhupa pyet nëse janë dritëgjata veprimet e Kumbaros e cila po shkatërron zonat e mbrojtura duke i kthyer praktikisht në toka truall të cilat do jepen falas për oligarkët duke shkatërruar mjedisin dhe ekosistemin e vecante që kanë.
“Pafytyrësia dhe papërgjegjshmëria e një ministre mjedisi që mbron publikisht shkatërrimin e mjedisit!
Mirela Kumbaro do mbush zonat e mbrojtura me “pika të vogla” resortesh private, klientësh dhe familjarësh të pushtetit dhe këtë e quan dritëgjatësi!!!!
“Të anatemosh ata që investojnë është dritëshkurtësi” shprehet Kumbaroja e ligjit në një intervistë televizive. A thua se po investojnë në tokën e tyre, në biznes privat dhe po anatemohem për këtë?!
Ndërkohë që Kumbaro po shkatërron zonat e mbrojtura duke i kthyer praktikisht në toka truall, ku mund të ndërtohen edhe betonizohen. Këto toka do jepen falas për oligarkët, do shndërrohen nga publike në private, duke shkatërruan edhe gjithë mjedisin dhe ekosistemin e vecante që kanë. Këto qënkan veprime dritëgjata për një ministre?!
Në fakt këto veprime janë kriminale, ligje klienteliste, me porosi që shkatërrojnë shtetit e së drejtës dhe të mirën publike. Projekti i Divjakës është njeri prej shkatërrimeve që është gati, por rradhën e ka Shushica, Pishë-Porro, Parku Kombëtar i Butrintit edhe dhjetra pika të tjera.
Mirela duhet të dilte në televizione vetëm për të lajmëruar dorëheqjen e saj, nëse do kishte dinjitet, me këtë masakër mjedisore që kanë përgatitur.”– ka shkruar Zhupa në një postim në rrjetet sociale.
